उल्टो पथमा शुक्रपथ

विदुर । शुक्रपथ बहुउद्देश्यीय सहकारी संस्था लिमिटेडको प्रमुख कार्यकारी अधिकृत (सिइओ) मधुकर वाग्लेले सहकारीको सो पदबाट राजिनामा दिएको एक महिना ११ दिन भयो । सञ्चालक समितिको जर्वजस्ती राजिनामा गर्न दवाव झेलेका उनले फागुन ११ गते सिइओ पदबाट राजिनामा दिए र सोही दिन सञ्चालक समितिले उनको राजिनामा स्विकृत गर्यो । तर शुक्रपथ बहुउद्देश्यीय सहकारी संस्था लिमिटेडको आधिकारिक वेभ साइट shukrapath.org मा हाल (आइतवार साँझ) सम्म उनै मधुकर वाग्ले नै सिइओका रुपमा छन् ।

पुर्व सिइओ वाग्ले र सो सहकारीको बोर्डबीच कार्यशैलीमा भिन्नता देखियो । सहकारीको सिद्धान्त र नियमावली भन्दा बाहिर पर्ने काममा तत्कालिन सिइओ वाग्लेको असहमती भएपछि उनलाई सहकारीका अध्यक्ष नरेन्द्र विष्ट लगातका पदाधिकरीले पद छाड्न दवाव दिन थाले । आफुले राजिनामा नदिए सञ्चालक समितिको बैठकबाट निर्णय गरेर सिइओ पदबाट हटाउने र अध्यक्ष विष्ट अनुकुलको सञ्चालक समितिको पदाधिकारीलाई नै सिइओमा ल्याउने जानकारी सञ्चालक समितिबाटै पाएपछि वाग्ले राजिनामा दिन बाध्य भएका हुन् । 

सामाचार श्रोतका अनुसार ‘बजारमा म्यासेज राम्रो नजाने’ भन्दै वाग्लेलाई आफ्नो वेभ साइट र सहकारीका अन्य कागजातमा शुक्रपथ बहुउद्देश्यीय सहकारी संस्था लिमिटेडका प्रमुख कार्यकारी अधिकृत (सिइओ) मधुकर वाग्ले नै प्रचार गरिरहेको छ । श्रोतले भन्यो– ‘राजिनामा नदिए निकाल्ने धम्की आउन थालेपछि वाग्ले सरले बाध्य भएर सहकारी छाड्नु परेको हो, सहकारी भित्रको थुप्रै विषय र कार्यको विषयमा उहाँको असहमती रहदै आएको थियो, उहाँ विधि विधानबाटै काम गरौं भन्नुहुन्थ्यो ।’ 

नुवाकोटमा सेवा केन्द्र सञ्चालन गर्ने विषयमा पनि पुर्व सिइओ मधुकर वाग्लेकै भुमिका प्रधान रहेको थियो । सहकारीले बागमती प्रदेशको १० जिल्लामा काम गर्ने भएपछि नुवाकोटमा शाखा सञ्चालनमा ल्याउने रणनीतिक योजना उनको थियो । वाग्ले नुवाकोट बेलकोटगढी नगरपालिका मदानपुरका हुन् । 

हटाइएपछि पुर्व कर्मचारी, सञ्चालक तथा सरोकार राख्नेहरूको सम्पर्कमा वाग्ले छैनन् । धेरै दिनको प्रयास पछि इमेज साप्ताहिकको सम्पर्कमा आएका पुर्व सिइओ वाग्लेले छाड्न वाध्य पारेको पुष्टि गरे । ‘मैले राजिनामा दिइसके म अहिले यो सहकारी सिइओ होइन’, वाग्लेले इमेज साप्ताहिकसंग भने– ‘राजिनामा दिइसकेको व्यक्तिलाई किन सिइओ भनेर प्रचार गर्नुभयो मलाई जानकारी छैन ।’ 

४ वर्षका लागि वाग्लेलाई सहकारीले सिइओ बनाउनका लागि सञ्चालक समितिको सदस्यबाट राजिनामा दिन लगाएका थिए । सञ्चालकबाट राजिनामा दिएर सिइओ बनेका उनलाई अहिले सो पदबाट पनि हटाइएको छ । उनलाई राजिनामा दिन लगाइएर सिइओमा सञ्चालक समितिका सचिव जीवन ओझालाई जिम्मेवारी दिइएको छ । 

फागुन ११ गतेदेखि नै सिइओको रुपमा कार्यरत ओझालाई सहकारीले गोप्य राखेको छ । उनको सामान्य विवरण समेत वेभ साइट तथा सहकारीको अन्य लिखित कागजातमा भेटिएको छैन । उनी सञ्चालक समितिको सचिव रहेको विवरण समेत सहकरीले सार्वजनिक गरेको छैन । वेभ साइटमा सञ्चालक समितिका सबै व्यक्तिको विवरण, नाम, फोटो सार्वजनिक हुँदा पनि सचिव तथा सिइओ ओझाको विवरण छैन । 

सहकारीसंग वडाले कर लिन मानेन

विदुर–२ को वडा कार्यालयमा सहकारीका कर्मचारी मंगलवार

बट्टार । शुक्रपथ बहुउद्देश्यीय सहकारी संस्था लिमिटेडका कर्मचारी ‘कर तिर्ने’ भन्दै अघिल्लो हप्ता विदुर नगरपालिका वडा नं. ४ को कार्यालयमा पुगेको थियो । उप शाखाका प्रवन्धक जयबहादुर थापा सहितको एक टोली वडा कार्यालयमा पुगेको थियो । ‘कुन शिर्षकको के विषयमा कर तिर्ने भन्ने हामीलाई प्रष्ट नपारी शुक्रपथ सहकारीको कर तिर्न आएको बुझिदिनु पर्यो भन्दै थिए’, वडाका एक कर्मचारीले भने– वडा नं. २ मा कार्यालय राखेर बसेको तपाईहरूको राजश्व वा अन्य कुनै कर हामीले लिन मिल्दैन भनेर पठायौं ।’ 

सहकारीका कर्मचारीले वडा कार्यालयमा राजश्व लिइदिन निक्कै नै जोडबल गरेका थिए । तर वडाका कर्मचारीहरूले सहकारी तोकिएको आफ्नो वडामा नबसेर अन्यत्र कार्यालय स्थापना गरेको जानकारी पाएकोले उनीहरूको प्रस्ताव स्विकार नगरेका हुन् । हाल कार्यालय स्थापना भएको स्थानको विवरण सहित सहकारीको सम्पूर्ण कागजात वडा कार्यालयले माग गरेपछि ‘भोलि ल्याउला’ भनेर हिडेका उनीहरू अहिलेसम्म वडा नं. ४ कार्यालय गएका छैनन् । ‘आजसम्म त्यो सहकारीले मलाई कुनै जानकारी दिएका पनि छैन र सम्पर्कमा आएका पनि छैनन्’, वडा अध्यक्ष टलकमान श्रेष्ठले भने– ‘कर लिइदिनु पर्यो भनेर कार्यालयमा आएको बेलाका कर्मचारीहरूले सहकारीको आधिकारिक कागजात सहित जानकारीमा आउन भनेपछि उनीहरू फेरि बेपत्ता भएका छन् ।’

त्यस लगत्तै वडा नं. २ को कार्यालय हान्निएका सहकारीका कर्मचारीहरूलाई वडा अध्यक्ष विरेन्द्र शाहीले ‘साढे छ महिनासम्म के हेरेर बसेको’ भनेर जिज्ञासा गरेका थिए । 

मंगलवार वडा अध्यक्ष शाहीको कार्यकक्षमा पुगेका सेवा केन्द्रका प्रवन्धक थापा र ऋण शाखाका प्रमुख रामेश्वर वाग्ले ठेगाना परिर्वतनका लागि सिफारिस लिनका लागि वडा कार्यालय पुगेका हुन् । आधा वर्षसम्म वडा कार्यालयलाई जानकारी नदिई र नगरपालिकाको सहकारी शाखामा समेत जानकारी नगराइ आर्थिक कारोवार गरेको भन्दै वडा अध्यक्ष शाहीले आपत्ति जनाएका थिए । आफुले पत्रिकामा समाचार आएपछि मात्रै आफ्नो वडामा सहकारीको कार्यालय रहेको र कारोवार गरिरहेको जानकारी पाएको भन्दै अब लफडा भएपछि सहकारीको जिम्मा नलिने भन्दै पन्छिए । ‘तपाईहरूले यत्ति लामो समयसम्म के के पो गरिसक्नु भयो, अब वडाबाट चिठ्ठी दिएर म विवादमा आउने र फस्के काम गर्दिन भन्दै वडा अध्यक्ष पन्छिए’, सो छलफल सुनेका एक व्यक्तिले भने– ‘सहकारीको सन्र्दभमा आफ्नो केही अधिकार नभएको भन्दै वडा अध्यक्षले विदुर नगरपालिकाका सहकारी शाखा प्रमुख पुष्कर शर्मा रिमाललाई नै मिटिङ्गमा बोलाइदिए ।’ सहकारीका प्रतिनिधिहरू वडा कार्यालयमा छलफलका लागि पुगेको सूचना पाउने वित्तिकै वडा नं. २ को कार्यालयमा यस इमेज साप्ताहिकका प्रतिनिधि पुगेको थियो । हाम्रा प्रतिनिधिको उपस्थिति देखेपछि सेवा केन्द्रका प्रवन्ध थापा र ऋण प्रमुख वाग्ले पिउदा पिउदैको चिया छाडेर बाहिरिए । 

वडा अध्यक्ष बिरेन्द्र शाहीले वडा कार्यालयमा सहकारीका कर्मचारीहरू सिफारिस अहिल्यै दिनु पर्यो भन्दै आएका र त्यस विषयमा जानकारी नभएकोले सहकारी शाखाका प्रमुख रिमाललाई बोलाइदिएको बताएका छन् । ‘उनीहरूले सिफारिस मागेको शैली र तरिका अल्ली शंकास्पद लाग्यो’, वडा अध्यक्ष शाहीले भने– पुष्करजीले उनीहरूलाई तपाईहरूको कानूनी कागजात के कस्तो छ त्यो उपलब्ध गराउनु पर्यो, निवेदन दर्ता गराउनुस् पहिला भन्नुभयो ।’ त्यसपछि उठेर हिडेका उनीहरूले वडा अध्यक्षलाई फोनबाट मात्रै दवाव दिइरहका छन् । ‘कहिले सहकारीको अध्यक्ष हुँ भनेर त कहिले सहकारीको फलानो पदको कर्मचारी हुँ भन्दै सिफारिस तत्कालै चाहियो भनेर फोन आउछ’ वडा अध्यक्ष शाहीले भने । उनीहरूले सिफारिस लिनका लागि वडा कार्यालयमा निवेदन समेत दिएका छैनन् । सहकारीको कुनै पनि दर्ता प्रमाणपत्र लगायतका कागजपत्र अहिलेसम्म कही प्रस्तुत गरेका छैनन् ।  

वडा नं. २ को कार्यालयले शुक्रपथ बहुउद्देश्यीय सहकारी संस्था लिमिटेडलाई अनाधिकृत रुपमा कार्यालय स्थापना गरेर आर्थिक कारोवार गरिरहेको विषयमा स्प्रष्टिकरण सोध्ने भएको छ । वडा अध्यक्ष शाहीले एक दुई दिन भित्र सहकारीको नाममा वडाबाट चिठ्ठी जाने र सहकारीको सम्पुर्ण जानकारी सहित कागजातहरू माग हुने बताएका छन् ।  

अरु जिल्लामा पनि यस्तै लफडा

नुवाकोट । विदुर नगरपालिका वडा नं. ४ मा सेवा केन्द्र स्थापना गर्ने स्विकृत लिएर वडा नं. २ मा बस्दै आएको शुक्रपथ बहुउद्देश्यीय सहकारी संस्था लिमिटेडको यही प्रकृतिको लफडा अन्य जिल्लामा पनि भेटिएको छ । न्यूरोडको प्रधान कार्यालय बाहेक यो सहकारीले अन्य नौं स्थानमा सेवा केन्द्र स्थापना गरेको छ । काठमाडौंमा प्रधान कार्यालय सहित छ वटा र अन्य चार जिल्लामा एक/एक वटा सेवा केन्द्र छन् । ललितपुरको लगनखेलमा, भक्तपुरको सुर्यविनायकमा, चितवनको भरतपुर र नुवाकोटको विदुरमा सेवा केन्द्र छ । 

नुवाकोटमा जस्तै भक्तपुर र चितवनमा समेत सहकारीको सेवा केन्द्र अनुमती लिएको भन्दा बाहिर बसेको फेला परेको छ । नुवाकोटमा जस्तै समस्या भोगिरहेको दुवै जिल्लामा भने समाधान भइसकेको सहकारीले दावी छ । 

सहकारीको लेखा समिति सदस्य देवप्रसाद घिमिरे भने नुवाकोटमा मात्रै समस्या बाँकी रहेको र अन्य जिल्लामा ‘मिलिसकेको’ दावी गर्छन् । ‘दुई ठाउँको विवरण सच्याउने काम भइसकेको छ, नुवाकोटको मात्रै ढिला भएको हो, तपाईले चैत महिना भरी नुवाकोटको पनि समाधान भएको खबर पाउनुहुने छ’ घिमिरेले भने । तर सहकारीको सदस्यलाई वितरण गर्ने प्रचार सामाग्री र वेभ साइटमै ठेगाना फरक फेला परेको छ । भक्तपुरको सेवा केन्द्रको ठेगाना एक ठाउँमा सुर्यविनायक–सुनदेवी ०५ र अर्को ठाउँमा सुर्यविनायक–४ भक्तपुर रहेको छ । 

नुवाकोटमा वडासम्म गठबन्धन हुने

गठबन्धको पहिलो बैठक शुक्रवार राती काँग्रेस पार्टी कार्यालय विदुरमा बस्ने क्रममा काँग्रेस सभापति महत (दाँयाँ), एकीकृत समाजवादी अध्यक्ष नेपाली (बीचमा) र माओवादी केन्द्रका संयोजक लामिछाने (बाँयाँ) । तस्बिर : कपिलदेव खनाल\इमेज

विदुर । नुवाकोटमा नेपाली काँग्रेस, नेकपा माओवादी केन्द्र र नेकपा एकीकृत समाजवादीले स्थानीय तह भागबण्डा गर्नका लागि गृहकार्य जारी राखेको छ । शुक्रवार साँझ काँग्रेसका जिल्ला सभापति रामेशकुमार महत, माओवादी केन्द्रका जिल्ला संयोजक पुष्प लामिछाने र समाजवादीका जिल्ला अध्यक्ष गोबिन्द नेपालीबीच पहिलो बैठक भएको थियो । 

संघीय सरकारमा सम्लग्न गठबन्धन दलहरूको केन्द्रीय संयन्त्रको निर्णय तथा सम्वन्धी पार्टीको केन्द्रीय समितिको परिपत्र अनुसार तीन दलले नुवाकोटमा गृहकार्य गरिरहेको हो । शुक्रवार र आइतवार गरी दुई पटक नुवाकोटमा तीन दलका नेताहरू छलफलमा बसेका छन् ।  

नुवाकोटको १२ वटा पालिका मध्ये काँग्रेसले ७, एमालेले ३ र माओवादी २ मा जितेको छ । सबै स्थानीय तहमा गठबन्ध कायय राख्ने गरी सबै सबै दलको सम्मानजनक हैसियत कामय राख्ने गरी स्थानीय तह भाग लगाउने गरी छलफल चलिरहेको छ । 

माओवादी केन्द्रका जिल्ला संयोजक पुष्प लामिछानेका अनुसार कुन दललाई कुन स्थानीय तह भन्ने गरी छलफल नभइसकेको र थुप्रै विकल्पहरूमा तीन पार्टीले खुल्ला भएर छलफल गरिरहेका छन् । गठबन्धनलाई नतिजामुखी बनाउने विषयलाई केन्द्रमा राखेर छलफल भइरहेको उनले बताएका छन् । पछिल्लो छलफलमा कसलाई कुन स्थानीय तहको नेतृत्व र वडातहसम्म हुने भागबण्डालाई बैज्ञानिक मापदण्डको बारेमा कुरा भएको छ । काँग्रेस सभापति रमेशकुमार महतले केही दिनमै मापदण्डलाई अन्तिम रुप दिने र त्यसबाटै प्रायः कुराहरू प्रष्ट हुने बताए । 

समावजादी जिल्ला अध्यक्ष गोबिन्द नेपालीले छलफल उत्साहजनक रहेको र नुवाकोटका सबै स्थानीय तह र सबै वडासम्म गठबन्धन पुग्ने पक्का भएको बताएका छन् । 

समाजवादीको आँखा विदुर, बेलकोटगढी र तारकेश्वरमा

बट्टारमा भएको पत्रकार भेटघाटमा मुख्यमन्त्री राजेन्द्रप्रसाद पाण्डे (बाँयाँबाट दोश्रो) ।

विदुर । नेकपा एकीकृत समाजवादीका केन्द्रीय उपाध्यक्ष तथा बागमती प्रदेश सरकारका मुख्य मन्त्री राजेन्द्रप्रसाद पाण्डेले स्थानीय तह निर्वाचनमा आफ्नो पार्टीले नेकपा एमालेले यस अघि जितेको सबै ठाउँ गठबन्धनसंग माग गरेको बताएका छन् । 

शुक्रवार र शनिवार नुवाकोटका विभिन्न कार्यक्रममा सहभागि पाण्डेले सत्तारुढ दलहरू बीच भएको चुनावी गठबन्ध संघीय र प्रदेश निर्वाचनसम्म कायम रहने दावी गर्दै आफ्नो पार्टीपनि कमजोर नरहेको बताएका छन् । ‘एमालेले जुन जुन स्थानीय तह जितेको छ त्यो समाजवादीको भागमा हुनुपर्छ’, पाण्डेले भने– अवस्था परिस्थिति हेरेर केही यताउता हुने कुरा रहन्छ, तर गठबन्धनमा हाम्रो सहभागिता यसै गरी हुने छ ।’ गठबन्धमा रहेका दलहरू बीच छलफल सुरु भइसकेको र त्यसको सुरुवात नुवाकोटमा पनि भएको उदाहरण दिँदै उनले बाँडफाँडको खाका केहि दिनमै टुङ्गो लाग्ने बताए । 

उनको यस भनाईका आधारमा नुवाकोट जिल्लाको विदुर नगरपालिका, बेलकोटगढी नगरपालिका र तारकेश्वर गाउँपालिका समाजवादीको रोजाईको क्षेत्रमा पर्ने देखिएको छ । उनको यो अभिव्यक्तिपछि समाजवादीका नुवाकोट स्थित नेताहरू समेत पहिला एमालेले जितेको स्थानीय तह चाहिने आशय ब्यक्त गर्न थालेका छन् । तर नुवाकोटमा रहेको दुई वटै नगरपालिका समाजवादीको रोजाईमा पर्दा स्थानीय तह बाँडफाँडको कार्यान्वयनमा समस्या हुने अन्य दलका नेताहरूले बताउन थालेका छन् ।  

समाजवादीका केन्द्रीय उपाध्यक्ष तथा बागमती प्रदेश सरकारका मुख्य मन्त्री राजेन्द्रप्रसाद पाण्डेले स्थानीय निर्वाचनमा सबै स्थानमा गठबन्धन नहुनसक्ने भएपनि केन्द्रमा गठबन्धनमा रहेका दलहरूले पाँच दलीय गठबन्धनभन्दा बाहिर गएर आगामी निर्वाचनमा चुनावी तालमेल नगर्ने सहमति भएको बताएका छन्  । ‘गठबन्धन हुने कुरा चाँही तपाईहरू ढुक्क रहनुस् है’ पाण्डेले भने । एकै दलको मात्र बाहुल्यता भएको स्थानमा गठबन्धन कस्तो गर्ने टुङग्याउन बाँकी रहेकाले ८० प्रतिशत स्थानीय तहमा गठबन्धन हुने उनको तर्क छ । 

शुक्रवार दिउँसो हेलिकोप्टरमार्फत् नुवाकोट आएका उपाध्यक्ष एवं मुख्यमन्त्री पाण्डेले शुक्रवारनै नुवाकोटका पत्रकारहरूसंग भेटघाट गरेका थिए । त्यसपछि जिल्ला स्थित नेकपा एकीकृत समाजवादीका नेता कार्यकर्ताहरूसंग भेटघाट गरेको पाण्डेले शनिवार तीन वटा औपचारिक कार्यक्रम भ्याएका छन् । । विदुर नगरपालिका वडा न. ५ को पिपलटारमा निर्माण भएको फुटसलको पाण्डेले उद्घाटन गरेका छन् । त्यस्तै शनिवार नै लिखु गाउँपालिका र तादी गाउँपालिकामा नेकपा एकीकृत समाजवादीको गाउँ सम्मेलनको उद्घाटन समेत पाण्डेले गरेका छन् । 

विभिन्न कार्यक्रममा प्रमुख अतिथिका रुपमा सहभागी मुख्यमन्त्री पाण्डेले बागमती प्रदेश सरकारले शिक्षा र यातायात क्षेत्रमा आमूल परिवर्तन ल्याउन लागेको समेत दाबी गरेका छन् । उनले बागमती प्रदेशभित्रका ११९ स्थानीय तहका दलित, अल्पसंख्यक वा लोपोन्मुख वा सिमान्तकृत मध्येबाट एक/एक जनालाई एसईई पछि तीन वर्षे प्राविधिक शिक्षा दिएर आफ्नो स्थानीय तहमा फर्काउने बताए । प्रदेशका सामुदायिक विद्यालयबाट एसईई गरेर सामुदायिक कलेजमा उच्च शिक्षा लिने सबै छोरीहरूलाई छात्रवृत्ति दिने पनि मुख्यमन्त्री पाण्डेले बताए ।

उनले सार्वजनिक यातायातमा क्यासलेस गर्न कार्ड घोट्ने व्यवस्था ल्याउन लागिरहेको बताएका छन् । सार्वजनिक यातायातमा झन्झटिलो भाडादर तिनुपर्ने व्यवस्थालाई सहज गर्न नागरिकको सुविधाको लागि डिजीटल पेमेन्टको व्यवस्था गर्न लागेको मुख्यमन्त्री पाण्डेले बताएका छन् । त्यसै गरी प्रदेश सरकारले सवारी चालक अनुमतिपत्र (लाइसेन्स) लिने वर्षै लामो प्रक्रियालाई अन्त्य गर्दै एकै दिनमा लाइसेन्स दिने व्यवस्था गर्न लागेको बताएका छन् । त्यसका लागि प्रत्येक जिल्लामै ट्रायल लिने ब्यवस्था हुने पाण्डेले बताए । 

नुवाकोट जिल्ला कोरोनामुक्त

विदुर । लामो समयपछि फेरि नुवाकोट जिल्ला गएको आइतबारदेखि कोरोना संक्रमणमुक्त भएको छ । यसअघि संक्रमित भएर उपचार गराउँदै आएका बेलकोटगढी नगरपालिका घर भएका दुई व्यक्ति गएको आइतबार संक्रमणबाट मुक्त भएसँगै जिल्ला पनि कोरोनामुक्त भएको हो ।

त्यसपछि यो हप्ता भरी नुवाकोटमा कुनै पिसिआर पिरिक्षण पनि भएको छैन । स्वास्थ्य कार्यालयका सूचना अधिकारी एवं खोप अधिकृत अमृत महर्जनले जिल्लामा यसअघि संक्रमित भएका सबै निको भएको र नयाँ संक्रमित थप नभएका बताएका छन् । कोरोनाको तेस्रो लहर जिल्लामा गत पुस २५ मा भित्रिएको थियो । भाइरस देखापरेको दुई महिनापछि नियन्त्रणमा आएको हो । 

नुवाकोट जिल्लामा २०७७ जेठ ११ मा ओखरपौवाका एक व्यक्तिमा भाइरसको संक्रमण देखापरेको थियो । पहिलो लहर २०७७ फागुन २३ गतेदेखि संक्रमणमुक्त बनेको थियो ।

२०७७ चैत २४ मा दोस्रो लहर सुरु भएर गत पुस १४ सम्म कायम रहेको थियो । यसको दश दिनपछि पुनः पुस २५ गते कोरोनाको तेस्रो लहर भित्रिएको नुवाकोट जिल्लामा पहिचान भएको थियो । 

गएको आइतबारदेखि कोरोना मुक्त भएको स्वास्थ्य कार्यालयका प्रमुख (वरिष्ठ जनस्वास्थ्य प्रशासक) महेन्द्रध्वज अधिकारीले जानकारी दिए । उनका अनुसार कोरोनाको पहिलो लहरमा एक, दोस्रो लहरमा ५१ जनाको निधन भएको थियो भने तेस्रो लहरमा मृत्युदर शून्य रह्यो । हालसम्म नुवाकोट जिल्लामा कोरोनाको कारण निधन हुनेको संख्या ५२ जना कायम रहेको छ ।

कोरोनाको पहिलो लहरमा एक हजार १४५ संक्रमित पहिचान भएकोमा दोस्रो लहरमा सात हजार २४५ र तेस्रो लहरमा ९७३ थप भएका थिए । हालसम्म संक्रमित हुने कुल संख्या जिल्लामा नौ हजार ३६३ पुगेपछि संक्रमणमुक्त जिल्ला बनेको हो ।

ठेकेदार भागेपछि काम अलपत्र

विदुर । राष्ट्रिय गौरवको योजना गल्छी–त्रिशुली–मैलुङ–स्याफ्रुवेंशी–रसुवागढी सडकको ठेकेदार कम्पनीले बीचमै काम छोडी सम्पर्कबिहिन हुँदा मैलुङ–स्याफ्रु खण्डको स्तरोन्नती एवं सुधारको काम अलपत्र परेको छ ।

मैलुङदेखि स्याफ्रुवेंशीसम्म १९ किलोमिटर भू–भागको स्तरोन्नती टेवापर्खाल, नाली निर्माण एवं कालोपत्र समेतका कार्यसम्पन्न गर्न ठेक्का पाएको भारत सिद्धिशाही कन्स्ट्रक्सन जेभीले काम नगर्दा राष्ट्रिय गौरवको आयोजना निर्माण अलपत्र परेको छ । २०७९ पुस ३० सम्ममा सडक स्तरोन्नतीको काम सम्पन्न गर्ने गरी श्री भारत कन्स्ट्रक्सन/सिद्धिसाई जेभीले गल्छी–त्रिशुली–मैलुङ–स्याफ्रुवेंशी–रसुवागढी सडक योजनासँग २०७७ साउन १ गते सम्झौता गरेको थियो । 

सम्झौताको अवधि अब १० महिना मात्रै बाँकी छ । हालसम्म भौतिक प्रगति सन्तोषजनक नभएको योजनाका प्रमुख शाक्यले बताए । १ अर्ब ४५ करोड रुपैयाँको लागतमा सम्पन्न गर्ने सम्झौता गरेको सो कन्स्ट्रक्सनले ३५ करोडको बिल भुक्तानी लिएर फागुन ५ गतेदेखि काम छाडी सम्पर्कबिहिन भएको हो । उक्त कन्स्ट्रक्सनलाई पत्रचार गरेर काममा फर्कनलाई ताकेता गरिरहेको गल्छी–त्रिशुली–मैलुङ–स्याफ्रुवेंशी–रसुवागढी सडक योजनाका प्रमुख निरज शाक्यले बताए । ठेकेदार कम्पनीका जिम्मेवार प्राविधिक फागुनमा निर्माण उपकरण र सवारी साधन समेत लिएर हिडेपछि काम पूर्णरूपमा बन्द छ ।

लिएको काम छोडी बिस्तारमा बाधा पु-याएका कारण सूचना जारी गरी काममा फर्कन आग्रह गर्दा सम्पर्कमा नआएकाले नियमानुसार कारबाही प्रक्रिया अगाडी बढाईएको छ । ठेक्का रद्दका लागि चरणबद्धरूपमा दोस्रो सूचना पुनः जारी गर्ने तयारीसमेत भईरहेको प्रमुख शाक्यले बताए । काम छोडी त्रिदेशीय राजमार्ग निर्माणमा बाधा पु¥याउने कम्पनी पुनः काममा नफर्किए निजले अग्रिम पेश्कीबापत बुझेको साढे बाह्र करोड असुल गरी नयाँ प्रक्रियामा अगाडि बढ्न योजना कार्यालय बाध्य हुने बताईएको छ । नेपाली सेनाद्वारा डबल लेनमा खोलिएको सो राजमार्गमा हालसम्म सुधारका कार्य भने २३ प्रतिशत मात्र भएको छ । गल्छीदेखि स्याफ्रुसम्म निर्माण गर्नुपर्ने १६ वटा मध्ये ४ सम्पन्न भएको र अन्य पुल निर्माण भईरहेका छन् ।

सम्पन्न हुने पुलमा नुवाकोट जिल्लाको कोल्फुखोला, महेशखोला, गेर्खु खोला र रसुवा एवं नुवाकोटको सिमाना फलाखु खोलाको पुल साइटका स–साना कामबाहेक अन्य संरचना निर्माण सम्पन्न भईसकेको छ । 

काँग्रेसले काँग्रेससंग नै गठबन्धन गरौं : केसी

विदुर । नेपाली कांग्रेसका केन्द्रीय सदस्य अर्जुननरसिंह केसीले कांग्रेसले चुनावमा कुनै पनि दलसंग गठबन्धन गर्नु आवश्यक नभएको बताएका छन् । उनले काँग्रेसले काँग्रेससंग गठबन्ध गरे मात्रै पुग्ने तर्क अघि सारेका हुन् । 

बिहीबार नुवाकोट सदरमुकाम विदुरमा आयोजित चियापान कार्यक्रममा बोल्दै नेता केसीले कांग्रेस एक ठाउँमा उभिए चुनावमा कुनै गठबन्धनको बैसाखी आवश्यक नरहेको बताए । नुवाकोटका काँग्रेस एक ठाउँमा उभिएर चुनावी मैदान उत्रिए जिल्लाका सबै स्थानीय तहको निर्वाचन जित्ने नेता केसीले बताए । नुवाकोटमा १० गाउँपालिका र २ नगरपालिका छन् । उनले भने, ‘सबै एकजुट भएमा स्थानीय चुनावका १० वटा गाउँपालिका र २ वटा नगर जित्छौं । कसैले रोकेर रोकिँदैन । तर मनपरि गर्न खोज्यो भने एउटा वा दुईवटा चाहिँ जित्छौँ; अरु भन्न सकिन्न ।’ उनले कम्युनिस्टले भ्रमको खेती गरेर दुईतिहाईको सरकार आएको बताउँदै आफू सत्तामा हुँदा सरकारसमेत चलाउन नसकेको र प्रतिपक्षमा हुँदा समेत संसद अवरुद्ध गरेको आरोप लगाए । 

उनका भाई नेपाली काँग्रेस नुवाकोटको सभापति पदका निकटतम् प्रतिस्पर्धी डा. केदानरसिंह केसीको निमन्त्रणमा आफ्नै विदुर स्थित निवासमा चियापान कार्यक्रम भएको थियो । त्यस अवसरमा अर्जुननरसिंह केसी, डा. केदारनरसिंह केसी र निर्वतनमा जिल्ला सभापति जगदीश्वरनरसिंह केसीको एकै खालको धारणा आएको छ । 

ओली कम्पनी अब शुन्य हुने छ : खनाल

पञ्चकन्या । नेपाल कम्युनिष्ट पार्टी एकीकृत समाजवादीका बरिष्ठ नेता तथा पुर्व प्रधानमन्त्री झलनाथ खनालले स्थानियतहको निर्वाचनमा नेकपा एमाले शुन्य हुने बताएका छन् ।

नेकपा एकीकृत समाजवादी नुवाकोट पञ्चकन्या गाउँपालिको भेलालाई बिहीवार सम्बोधन गर्दै खनालले अहिले केपी ओलीले एमाले पार्टीलाई कम्पनी जसरी चलाएको र तानाशाही भएको भन्दै निर्वाचनमा एमालेको नतिजा देशैभरिवाट शून्य हुने बताए । ‘ओली कम्पनी देशभरै भरी शुन्य हुन्छ’ केही दिन कुर्नुहोला’ खनालले भने । 

खनालले सत्ता गठबन्धन दलका बीच स्थानीय निर्वाचनमा गठबन्धन हुने र निर्वाचन तयारीमा लाग्न नेता तथा कार्यकताहरूलाई निर्देशन दिएका छन् । खनालले भने ‘अब समाजवादी क्रान्तिमा लाग्नु पर्ने र सामन्त वर्गले शासन गरेको ठाउँमा पुँजीवादीले शासन गरेको र यसलाई परास्त नगरेसम्म समाजवादमा पुग्न नसकिने हुनाले सच्चा कम्युनिष्ट हुनु पर्छ ।’ 

कार्यक्रम समाजवादी जिल्ला कमिटि सदस्य तथा गाउँपालिका ईन्चार्ज अर्जुन कार्कीको अध्यक्षतामा सम्पन्न भएको थियो । कार्यक्रममा पार्टी जिल्ला अध्यक्ष गोविन्द नेपाली, केन्द्रीय परिषद सदस्य सुर्य कँडेल, वागमती प्रदेश सदस्य केपी लामिछाने, युवासंघका केन्द्रीय उपाध्यक्ष नितेश पौड्याल, प्रदेश सदस्य राजेश थापा पार्टी उपाध्यक्ष शान्ता थापा अधिकारी, सचिव पदम उप्रेती, उपसचिव उद्धव पनेरु पञ्चकन्या गाउँपालिका अध्यक्ष तेजबहादुर तामाङ, पुर्व गाविस अध्यक्ष राम थापा लगायतले मन्तव्य राखे । उनीहरूले स्थानीय तहको निर्वाचनमा पाँच दलको गठवन्धन जरुरी रहेको बताउदै व्यवस्था र संविधान जोगाउन एक पटक प्रतिगामी दक्षिणपन्थीहरूको अन्त्यका लागि एक ढिक्का बन्नुपर्ने धारणा राखे । कार्यक्रममा प्रदेश सदस्य श्रीकृष्ण खतिवडा, रोशन थापा, जिल्लासचिवालय सदस्य रामहरि गजुरेल, दिपेश चित्रकार, सन्तोष थापा, देविन्द्र तामाङ, युवासंघ नुवाकोटका अध्यक्ष सुरेश अधिकारी लगायको सहभागिता थियो । 

गाउँ भेलाले अध्यक्षमा गणेश थापा, उपाध्यक्षमा यशोदा खतिवडा, सचिबमा शिद्विमणी मिश्र, उप–सचिबमा लेखतबहादुर केसी सहितको ३५ सदस्यीय गाउँपालिका कमिटी चयन गरेको छ । साथै उक्त भेलाले संघ नेपालको १३ सदस्यीय गाउँपालिका कमिटी समेत चयन गरेको छ । अध्यक्ष अनिल कार्की, उपाध्यक्ष भिमबहादुर तामाङ्ग, सरोज थापा, दिपेन्द्र थापा, सचिब प्रकाश थापा छन् । 

कविता

नेपाल प्यारो छ 

– गोपालप्रसाद गजुरेल

अमरसिंह अरु जो भए बिरपनि ती कालुपाडेहरू 

सीता भृकुटी जो अरु भए जसै ती शान्तिका दुतहरू

साराले गरि युद्ध यै भुमिमाहा यो देशको निम्ति यो

गर्वै साथ संगै म भन्दछु पनि प्यारो छ नेपाल यो ।

जाहितहि सुन्दर छन् अति मनोरमै छन् दृश्य चारैतिर

छन् शोभा हरियाली नि जांहितहि नदाीहरू सबतिर

पुर्खा कै बलिदान ले सजियको यो देश यस्तो छ हो

गर्वै साथ संगै म भन्दछु पनि प्यारो छ नेपाल यो ।

मेचीदेखि सीमा विस्तृत भई माहाकालीसम्म छ जुन 

जे जे छन्  जति देवताहरू सबै यै भुमिमा बस्तछन्

नाच्दै कोहिली गाउछन् गित पनि अत्यान्त हर्षित यो

गर्वै साथ संगै म भन्दछु पनि प्यारो छ नेपाल यो ।

गर्नेछन् पसिना बगाई पनि काम खुब धैर्य राखिकन 

जुट्छन शंकटमा एकैजुट भइ यो देशको निम्तिमा

कम्ति केही चिज छैन यो देशमाहा सबथोक भर्पुर यो

गर्वै साथ संगै म भन्दछु पनि प्यारो छ नेपाल यो ।

चारैतिर हिमाल सुन्दर अहो हासिरहेको पनि 

गाउछन मृदगान शेक्सपियरले ती लेखनाथ पनि 

राज गरे जब वुद्धले पनि यहि तेस्तै ती मन्जुश्री यो

गर्वै साथ संगै म भन्दछु पनि प्यारो छ नेपाल यो ।

गौरिशंखर छन् हिमालय माहा छन् देब चारैतिर 

जेजे छन् सब बिघ्न पार गरछन् कल्याण कै खातिर

मेरो मन अति प्रशन्न हुन गो गर्छु प्रशंसा त यो

गर्वै साथ संगै म भन्दछु पनि प्यारो छ नेपाल यो ।

विदुर नगरपालिका–५ पिपलटार

भत्ताबाट अक्षयकोष स्थापना

विदुर । विदुर नगरपालिका वडा नम्बर १ का वडासदस्य रुपा थापाले ‘युकुमारी कटकबहादुर थापा अक्षयकोष’ स्थापना गरेका छन् । स्वर्गीय हजुरबुवा र हजुरआमाको नाममा खडा गरिएको ६ लाख ७८ हजारको अक्षयकोषबाट प्राप्त हुने ब्याजले वडा क्षेत्रभित्रका विपन्न वर्गका नागरिकको शिक्षा, स्वास्थ्यलगायत अन्य सेवागत क्षेत्रलगायतमा सहयोग प्रदान गर्ने वडा सदस्य थापाले बताए । 

आफु जनप्रतिनिधि भएदेखि अहिलेसम्म वडा कार्यालयबाट सेवाबापत् प्राप्त गरेको ३ लाख ७८ हजार नगदसहित परिवारबाट जम्मा भएको रकमले कोष स्थापना भएको उनले आफ्नो फेसबुक पेज मार्फत् सार्वजनिक गरेका छन् । थप ३ लाख रुपैंयाँ गरी कुल ६ लाख ७८ रुपैंयाँको अक्षयकोष स्थापना भएको हो । उनले भनिन् –‘आगामी स्थानीय तहको निर्वाचनमा आफु जनप्रतिनिधि भएर सेवा गर्न पाए वा नपाएपनि विपन्न नागरिकको साथ र सहयोगको लागि यो कोष स्थापना गरेको हुँ ।’

उनले २०७४ सालको स्थानीय तहको निर्वाचनमा ६६० मत ल्याई महिला सदस्यमा नेकपा एमालेबाट निर्वाचित भएकी थिईन् । उनी महिला, बालबालिका र अपाङ्गता भएका व्यक्तिहरूको हक, अधिकारमा सक्रिय भई कार्य गर्दै आईरहेकी छिन् । उनी साहित्य विधामा अब्बल छिन् । उनको सयौं कविता, गजल, कथाहरू विभिन्न पुस्तक संग्रह, छापा पत्रपत्रिका, अनलाईन पत्रिकालगायतमा प्रकाशित छ ।

नुवाकोटमा २ लाख ३७ हजार मतदाता

विदुर । जिल्ला निर्बाचन कार्यालय नुवाकोटले नुवाकोटको १२ वटै स्थानीय तहको अन्तिम मतदाता नामावली प्रकाशन गरेको छ ।

मतदाता नामावलीसँगै, मतदान केन्द्र, मतदान स्थल समेत तोकेको छ । १२ वटै स्थानीय तहको मतदाता नामावली संकलन पछि वडा वडामा दाबि बिरोधको लागी नामावली टाँस गरेको थियो । आयोगले मतदानमा कायम रहने नामावली प्रकाशन गरेको हो । बैशाख ३० गते तोकिएको स्थानीय तहको निर्बाचनमा हाल प्रकाशन भएको नामावलीमा नाम रहेकाहरूले मात्रै मतदान गर्न पाउने छन् । तोकिएको मतदान केन्द्र र मतदान स्थलमा गएर मतदान गर्नुपर्ने जिल्ला निर्बाचन कार्यालय नुवाकोटका प्रमुख जयप्रसाद गौतमले जानकारी दिए । 

आगामी वैशाख ३० गते हुने स्थानीय तहको निर्वाचनमा नुवाकोटका २ लाख ३७ हजार ४ सय ३४ जनाले मताधिकार गर्न पाउनेछन् । निर्वाचन आयोगले मतदाता नामावली ऐन बमोजिम गत माघ २४ गतेसम्म नामावली दर्ता गराएका र वैशाख २९ गतेसम्म १८ वर्ष उमेर पूरा हुने नेपाली नागरिकको नामावली मतदानका लागि स्वीकृत गरेको हो । स्वीकृत गरेको मतदाता नामावली अनुसार नुवाकोटका १ लाख २२ हजार ४०२ जना पुरुष, १ लाख १५ हजार २९ जना महिला र तेश्रो लिङ्गी ३ जनाले मताधिकार प्रयोग गर्न पाउनेछन् ।

नुवाकोटको १२ स्थानीय तह मध्ये सबैभन्दा बढी विदुर नगरपालिकामा र सबै भन्दा कम किस्पाङ गाउँपालिकामा मतदाता छन् । जिल्ला निर्बाचन कार्यालय नुवाकोटका अनुसार नुवाकोटको ककनी गाँउपालिका २१ हजार ८९७ जना मतदाता ११ मतदान स्थल र २५ मतदान केन्द्र तोकिएको छ । किस्पाङ गाँउपालिका १२ जार १६१ जना मतदाता ६ मतदान स्थल र १५ मतदान केन्द्र, तादी गाँउपालिका १५ हजार ३६० जना मतदाता ७ मतदान स्थल र १९ मतदान केन्द्र, तारकेश्वर गाँउपालिका १४ हजार ९६३ जना मतदाता ८ मतदान स्थल र १९ मतदान केन्द्र रहेका छन् ।

दुप्चेश्वर गाँउपालिका १७ हजार ३७५ जना मतदाता १५ मतदान स्थल र २३ मतदान केन्द्र, पञ्चकन्या गाँउपालिका १४ हजार ९६४ जना मतदाता ६ मतदान स्थल र १७ मतदान केन्द्र तोकिएको छ । बेल्कोटगढी नगरपालिका ३३ हजार ४८१ जना मतदाता १६ मतदान स्थल र ४० मतदान केन्द्र, म्यागङ गाँउपालिका १२ हजार ५७८ जना मतदाता ८ मतदान स्थल र १६ मतदान केन्द्र रहेका छन् ।

लिखु गाँउपालिका १५ हजार ४६८ जना मतदाता ७ मतदान स्थल र १७ मतदान केन्द्र, बिदुर नगरपालिका ४४ हजार १७९ जना मतदाता २६ मतदान स्थल र ५४ मतदान केन्द्र, शिबपुरी गाँउपालिका २० हजार ४८१ जना मतदाता १२ मतदान स्थल र २४ मतदान केन्द्र र सुर्यगढी गाँउपालिका १४ हजार ५२७ जना मतदाता १० मतदान स्थल र १८ मतदान केन्द्र तोकिएको जिल्ला निर्बाचन कार्यालय नुवाकोटले जनाएको छ । यस्तै, नुवाकोटको ककनी, शिबपुरी र दुप्चेश्वर गाँउपालिकामा १÷१ जना तेश्रो लिङगी समेत रहेका छन् ।

निर्वाचन आयोगले मतदाता नामावली ऐन बमोजिम गत माघ २४ गतेसम्म नामावली दर्ता गराएका र वैशाख २९ गतेसम्म १८ वर्ष उमेर पूरा हुने नेपाली नागरिकको नामावली मतदानका लागि सार्वजनिक गरेको हो । नुवाकोटमा मतदान स्थल १३२ र मतदान केन्द्र २८७ कायम गरिएको निर्वाचन आयोगले जनाएको छ ।

यस अघि, निर्बाचन आयोगले नुवाकोटको १२ वटै स्थानिय तहमा निर्बाचन अधिकृत र मुख्य निर्बाचन अधिकृत तोकी सकेको छ । निर्बाचन आयोगले राजपत्राङकृत दोश्रो श्रेणीका अधिकृतहरूलाई निर्बाचन अधिकृतको रुपमा स्थानीय तहमा खटाएको छ । मुख्य निर्बाचन अधिकृतको रुपमा सम्बन्धित जिल्ला न्यायधीशहरूलाई जिम्मेवारी दिएको छ । यसका साथै, न्याय क्षेत्र, संघिय मामिला तथा स्थानीय बिकास मन्त्रालय, सत्यनिरुपण आयोग, न्यायिक प्रशासन लगायतका क्षेत्रमा कार्यरत रहेका दोश्रो श्रेणीका अधिकृतहरूलाई निर्बाचन अधिकृतमा प्राथमिकतामा राखेको छ । 

यसै गरी, जिल्ला निर्बाचन कार्यालय नुवाकोटले जिल्लामा रहेका संघ, प्रदेश र स्थानीय तहमा कार्यरत रहेका कर्मचारीहरूको बिवरण समेत संकलन गरिसकेको छ । निर्बाचनका लागी मतदान केन्द्रमा कर्मचारी खटाउनको लागी जिल्लामा रहेका सबै कार्यालयहरूबाट कर्मचारी बिवरण संकलन गरेको जनाएको छ । संकलन भएको बिवरण अनुसार आयोगले उनिहरूलाई छनौट गरि मतदान केन्द्रको आबाश्यक निर्बाचन सामाग्री सहित कार्यक्षेत्र तोकेर खटाउने छ ।

यसै बीच, नुवाकोटको छिमेकी रसुवा जिल्लामा आगामी वैशाख ३० गते हुने स्थानीय तहको निर्वाचनका लागि ३४ वटा मतदानस्थल तथा ५१ वटा मतदान केन्द्र रहने भएको छ । 

गोसाइँकुण्ड गाउँपालिकामा आठवटा मतदानस्थल र नौवटा मतदान केन्द्र, कालिका गाउँपालिकामा ६ वटा मतदानस्थल र ११ वटा मतदान केन्द्र, आमाछोदिङ्मो गाउँपालिकामा ६ वटा मतदानस्थल र पाँचवटा मतदान केन्द्र, उत्तरगया गाउँपालिकामा ६ वटा मतदानस्थल र ११ वटा मतदान केन्द्र, नौकुण्ड गाउँपालिकामा आठवटा मतदानस्थल र १४ वटा मतदान केन्द्र तोकिएको जिल्ला निर्वाचन कार्यालय रसुवाले जनाएको छ । एक निर्वाचन क्षेत्र र पाँच गाउँपालिका रहेको रसुवा जिल्लामा ३८ हजार ५४५ मतदाता मध्ये १८ हजार ८८५ महिला र १९ हजार ६८९ जना पुरुष रहेको निर्वाचन कार्यालयले जनायो ।

सबै तहका लागि निर्वाचन अधिकृत नियुक्त

विदुर ।  वैशाख ३० गते हुने स्थानीय तहको निर्वाचनका लागि नुवाकोटमा मुख्य निर्वाचन अधिकृत र निर्वाचन अधिकृत नियुक्त भएका छन् । नुवाकोटको प्रमुख निर्वाचन अधिकृतमा उमेशप्रसाद लुईंटेललाई तोकिएको छ । आयोगका अनुसार नुवाकोट जिल्ला अदालतका न्यायाधीश लुईंटेल विदुर नगरपालिकाको निर्वाचनमा खट्ने छन् ।

जिल्लाका अन्य स्थानीय तहको लागि निर्वाचन अधिकृत तोकिएको छ । बेलकोटगढीको निर्वाचन अधिकृतमा महान्यायधिवक्ताको कार्यालयका उपन्यायधिवक्ता टेकबहादुर कार्कीलाई निर्वाचन अधिकृत जिम्मेवारी दिईएको छ । ककनी गाउँपालिकामा निर्मला गुरुङ, किस्पाङ गाउँपालिकामा जिल्ला न्यायधीवक्ता टेकराज भुसाल, तादी गाउँपालिकामा विवेक घिमिरे, तारकेश्वर गाउँपालिकामा जीवनकुमार भण्डारी, दुप्चेश्वर गाउँपालिकामा पहिलाको जिविस नुवाकोटका एलडिओ केशरबहादुर पण्डित, पन्चकन्या गाउँपालिकामा अन्जन न्यौपाने, म्यागङ गाउँपालिकामा सुदर्शन पण्डित, लिखु गाउँपालिकामा पूर्णबहादुर थापामगर, शिवपुरी गाउँपालिकामा खरुदेव चुडाल र सुर्यगढी गाउँपालिकामा इन्द्रकुमार खड्कालाई निर्वाचन अधिकृत जिम्मेवारी दिईएको छ । निर्वाचन आयोगको सूचना अनुसार चैत २९ गतेदेखि लागू हुने गरी मुख्य निर्वाचन अधिकृत र निर्वाचन अधिकृत पदमा नियुक्त गरिने जनाएको छ ।

रसुवाका लागि जिल्ला न्यायाधीश राजेन्द्र नेपाल र धादिङका लागि जिल्ला न्यायाधीश रमेशप्रसाद ज्ञवालीलाई नियुक्ति गरेको छ । नेपाललाई रसुवाको गोसाइँकुण्ड गाउँपालिका र 

ज्ञावालीलाई धादिङको नीलकण्ठ नगरपालिका तोकिएको छ । रसुवाको उत्तरगया गाउँपालिकामा मुना अधिकारी ढकाल, कालिकामा अशोकराज रेग्मी, नौकुण्ठमा थानेश्वर भुसाल र आमाछोदिङ्मोमा शान्तिप्रसाद लुइँटेललाई निर्वाचन अधिकृत नियुक्ति गरिएको छ । 

धादिङको खनियाँबास गाउँपालिकामा गोकुल खड्का, गंगा–जमुनामा रामकृष्ण तामाङ, गजुरीमा चक्रपाणि शर्मा, गल्छीमा दीपेन्द्र सुवेदी, ज्वालामुखीमा हीरामणि सुवेदी, त्रिपुरासुन्दरीमा गोपाल लामिछाने, थाक्रेमा महेन्द्रप्रसाद साँखी, नेत्रावती डबजोङमा आनन्दराज पन्त, बेनीघाट रोराङमा खेमराज पाठक, रुविभ्यालीमा भीमप्रसाद सुवेदी, सिद्धलेकमा खुवप्रसाद भण्डारी र धुनीबेँसी नगरपालिकामा राजकुमार आचार्य नियुक्त भएका छन् ।

निर्माण व्यवसायीको ज्ञापनपत्र

विदुर । इन्धनलगायतका निर्माण सामग्रीमा मूल्यवृद्धिका कारण मुलुकको निर्माण उद्योगमा गम्भीर समस्या परेको भन्दै नुवाकोट निर्माण व्यवसायी संघले नुवाकोटका प्रमुख जिल्ला अधिकारी मार्फत् बिहीवार प्रधानमन्त्रीलाई १० बुँदे ज्ञापनपत्र बुझाए । 

नेपाल निर्माण व्यवसायी महासंघको केन्द्रीय निर्देशनानुसार देशभरका ७७ वटै जिल्लामा शुक्रवार प्रधानमन्त्रीलाई ज्ञापनपत्र बुझाएका हुन् । निर्माण व्यवसायीहरूले मूल्यवृद्धि समायोजन गर्न माग गर्दै नुवाकोट निर्माण व्यवसायी संघले बिहिबार प्रमुख जिल्ला अधिकारी नारायणप्रसाद रिसालमार्फत प्रधानमन्त्री लाई ज्ञापनपत्र बुझाउँदै मूल्यवृद्धि नियन्त्रण र समायोजन गर्न माग गरेको हो । संघका कार्यसमिति सदस्य श्रीराम तामाङ नेतृत्वको टोलीले ज्ञापनपत्र बुझाएको हो । 

ज्ञापनपत्रमा निर्माण सामग्रीमा भएको मुल्यवृद्धि, सार्वजनिक खरिद नियमावली, २०६४ को एघारौं संशोधनको त्रुटि सच्चाउने, बीमा प्रिमियम दरमा भएको मुल्यवृद्धि र राजश्व सम्बन्धि १० बुँदे मागहरू उल्लेख छ । सरकारमार्फत यस समस्याको सूक्ष्म विश्लेषण र अनुगमन गरी मूल्यवृद्धि नियन्त्रणका लागि समेत ठोस पहल गर्न ज्ञापनपत्रमा माग गरिएको छ । मागहरू चैत २४ गते भित्र सम्बोधन नभए संघको नेतृत्वमा आन्दोलनका कार्यक्रमहरू गर्न बाध्य हुने चेतावनी दिइएको छ ।

एमालेसंग जोडिने मुडमा राप्रपा

विदुर । नुवाकोटमा अन्य राजनीतिक दल भन्दा पहिल्यै राप्रपाले स्थानीय तह निर्वाचन केन्द्रीत आफ्नो ‘सङ्कल्पपत्र’ सार्वजनिक गरेको छ ।

व्यवस्थापिका संसद्को चौथो ठूलो शक्ति राष्ट्रिय प्रजातन्त्र पार्टीले स्थानीय तहको निर्वाचनका लागि नुवाकोटमा प्रतिबद्धतापत्र सार्वजनिक गरेको हो । राप्रपाले नुवाकोटमा लिखु गाउँपालिका वडा नं. ४ को वडा अध्यक्षदेखि सबै सदस्यहरू अघिल्लो स्थानीय तह निर्वाचन जितेको थियो । पार्टी कार्यालय विदुरमा पत्रकार सम्मेलन गर्दै राप्रपा नुवाकोटले प्रतिबद्धता सार्वजनिक गरेको हो । ‘राप्रपाको अभियान सकारात्मक परिवर्तन, राष्ट्रियता, हिन्दूराष्ट्र, विकास र सुशासन’ नारा दिइएको घोषणापत्रलाई पार्टीले ‘सङ्कल्पपत्र’को नाम दिएको छ । 

राप्रपाले सनातन हिन्दूराष्ट्र, राजसंस्थासहितको लोकतन्त्र सुदृढ, स्थानीय स्वायत्त शासन प्रणाली र आर्थिक उदारवादलाई प्रमख वैचारिक आधारस्तम्भ बनाएको छ । राष्ट्रिय प्रजातन्त्र पार्टी नवाकोटका अध्यक्ष कुलबहादुर खड्गीले जिल्लामा संवैधानिक व्यवस्थाअनुरूप सहकार्य गरी निर्वाचनबाटै एजेन्डा स्थापित गर्ने र सबै जनतामाझ पुग्ने प्रतिबद्धतापत्र सार्वजनिक गरेका हुन् । 

राप्रपाले नुवाकोटमा सार्वजनिक गरेको प्रतिबद्धतापत्रमा गरिबी हटाउन योजना, आवास, स्वास्थ्य, शिक्षा र रोजगारीलाई प्राथमिकतामा राखिएको छ । सुत्केरी महिलालाई तीन महिनासम्म मासिक दुई हजार रुपैयाँ पोषणभत्ता, सबै स्थानीय तहमा १० देखि १५ बेडको अस्पताल निर्माण, हाल राज्यले उपलब्ध गराएको भन्दा थप २० युनिट विद्युत् निःशुल्क उपलब्ध गराउने, प्रत्येक विद्यालयमा कम्प्युटर शिक्षा अनिवार्य गर्ने जनाएको छ । 

यसै बीच, सोही कार्यक्रममा सहभागि राप्रपाका केन्द्रीय सह–महामन्त्री झनक प्याकुरेलले नुवाकोटमा राप्रपामा आकर्षण बढेको बताए । नुवाकोटको १२ स्थानीय तहसहित ८८ वटै वडामा पार्टी कार्यालय स्थापना भइसकेको उनले जानकारी दिए । प्याकुरेलका अनुसार सत्तापक्षले चुनावी गठबन्ध गर्ने अवस्था भएमा विपक्षमा रहेका दलहरू पनि गठबन्ध गर्ने सम्भावना हुने भन्दै आफ्नो चुनावी तालमेल एमालेसंग हुनसक्ने संकेत दिएका छन् । ‘केन्द्रमा त यस विषयमा छलफल भइरहेको छ, जिल्ला तहमा यो सर्कुलर आएको छैन’, उनले भने– ‘आवश्यकताका आधारमा हामी सत्ता बाहिर रहेका दलहरू पनि गठबन्धन गर्ने सम्भावना उत्तिकै छ ।’

राष्ट्रिय कृषिगणना बैशाख ६ देखि जेठ १९ सम्म

विदुर । देशभर सातौं राष्ट्रिय कृषिगणना वैशाख ६ गतेदेखि जेठ १९ गतेसम्म हुने भएको छ । त्यसका लागि नुवाकोटमा पनि प्रायः तयारी भइसकेको छ । नुवाकोट जिल्लाका १२ वटै स्थानीय तहका २२१ गणना क्षेत्रहरूबाट पाँच हजार ५२५ कृषकको छनौट गरी गणना गरिने छ । 

जिल्ला कृषिगणना अधिकृत नरेन्द्र शर्मा भट्टका अनुसार गणनाका लागि नुवाकोट जिल्लामा २२ जना सुपरिवेक्षक र ८६ जना गणक खट्ने छ । कृषिगणनाबाट कृषिसँग सम्बन्धित सम्पूर्ण विवरण प्राप्त हुने छ । खेतीयोग्य जमिन, जमिनमा प्रयोग भइरहेको मलदेखि विषादीसम्मको विवरण समेट्ने गरी प्रश्नावली बनाइएको उनले जानकारी दिए । 

कृषिगणनामा नेपालका प्रत्येक जिल्लाको कृषि संरचना, गतिविधि तथा कृषि उत्पादनसँग सम्बन्धी विवरण संकलन गरिन्छ । कृषकले चलन गरेको जग्गाको आधार, जग्गाको उपभोग र उपयोग, बाली लागेको क्षेत्रफल र बालीको उत्पादन, सिंचाई, पशुपन्छी संख्या, कृषि औजारको उपयोग, कृषि कर्ममा संलग्न जनशक्तिजस्ता विषयमा तथ्याङ्क संकलन गरिने भएको छ ।

गएको आईतबार जिल्ला कृषिगणना नुवाकोटले विदुरमा आयोजना गरेको जिल्लास्तरीय कृषिगणना सचतेना कार्यक्रममा नुवाकोटका प्रमुख जिल्ला अधिकारी नारायणप्रसाद रिसालले यसबाट कृषि क्षेत्रको योजना तर्ज‘मा, कार्यान्वयन, अनुगमन तथा मूल्याङ्कनमा मुलुकलाई आवशयक पर्ने तथ्याङ्क उपलब्ध हुने बताए छ । 

मुलुक संघीयतामा गएपछि पहिलो कृषि गणना गर्न लागेको हो । विगतका कृषि गणनाहरूले कृषि संरचना, कृषि गतिविधि तथा कृषि उत्पादनसम्बन्धी विवरण जिल्ला तहसम्म मात्र दिँदै आएकोमा यसपटक संघीय ढाँचा अनुसारका गाँउपालिका÷नगरपालिका तह सम्मको तथ्याङ्क उपलब्ध हुने सहायक प्रमुख जिल्ला अधिकारी बेदप्रसाद अर्यालले बताए । 

कार्यक्रममा कोष तथा लेखा नियन्त्रण कार्यालय नुवाकोटका प्रमुख रामकृष्ण पुडासैनीले कृषकले चलन गरेको जग्गाको आकार, जग्गाको उपभोग र उपयोग, बाली लागेको क्षेत्रफल र बालीको उत्पादन, सिंचाइ, पशुपक्षीको संख्या जस्ता कुराहरू संकलन हुने भएकोले यो गणना महत्वपूर्ण हुने बताएका छन् । उनले भर्खरै जनगणना सकिएको र फेरि कृषिगणना के का लागि होला भन्ने नागरिकहरूमा प्रश्न रहनसक्ने र अघिल्लो जनगणनाबाट नै कृषकहरूको पहिचान भएपछि कृषिगणना हुने जानकारी दिनु आवश्यक रहेको बताए । ‘त्यसका लागि सञ्चार माध्यमको भूमिका महत्वपूर्ण रहन्छ, उनले भने– ‘कृषकहरूलाई यसको आवश्यकता र उपलब्धीका बारेमा अग्रिम जानकारी गराउनु आवश्यक छ ।’

यस वर्षको नारा ‘कृषिगणनाको सार, कृषि योजनाको पूर्वाधार’ छ । 

राष्ट्रिय कृषि गणना भनेको के हो ?

नेपालको कृषि क्षेत्रको विवरण जस्तैः कृषि चलन, खेतीपाती गरिएका कित्ताहरूको क्षेत्रफल, विभिन्न बालीनालीको क्षेत्रफल र उत्पादन, पशुपक्षीको संख्या, सिँचाई, कृषि सामग्रीको प्रयोग, माछापालन, वनवनेलो आदि विवरणहरू संकलन, प्रशोधन तथा प्रकाशन गर्ने समग्र कार्य नै राष्ट्रिय कृषि गणना हो । नेपालमा वि.सं. २०१८ साल देखि हरेक दश दश बर्षमा कृषि गणना सञ्चालन भई आएको छ । यस क्रमको सातौ राष्ट्रिय कृषिगणना २०७८ चैत्र, वैशाख र जेठमा सञ्चालन हुँदैछ ।

कसरी सञ्चालन हुँदै छ ?

प्रथमतः राष्ट्रिय जनगणना २०७८ अन्तर्गत पारिवारिक विवरण संकलन गर्दा हरेक परिवारले चलन गरिआएको खेतीपातीको क्षेत्रफल र पशुपक्षीको संख्या संकलन गरिएको थियो । त्यही लगतको आधारमा ७७ जिल्लाको ७५३ गाँउपालिका र नगरपालिकाहरूमा वैज्ञानिक छनौट विधिले छानिएका गणनाक्षेत्र (वडा, वडाखण्ड) मा रहेका कृषक परिवारहरूको सूची अध्यावधिक गरी निश्चित मात्रमा कृषक परिवार छानि छानिएका कृषक परिवारसंग व्यक्तिगत अन्तर्वार्ताद्वारा कृषिचलन सम्वन्धी विस्तृत विवरण संकलन गरिने छ । यस गणना अन्तर्गत पारिवारिक, व्यावसायिक, तथा संस्थागत रुपमा संचालन भएका कृषिकार्यको विवरण संकलन गरिनेछ ।

सबै घर परिवारको संकलन गरिन्छ ?

राष्ट्रिय जनगणनामा २०७८ जस्तै कृषि गणनामा सवै घरपरिवारको गणना नभई ७५३ वटै स्थानीय तहहरूको प्रतिनिधित्व हुने तथा पुर्ण विवरण आउने गरी तथ्याङ्कीय विधिबाट छानिएका करिव तीन लाख पचास हजार कृषक घरपरिवारको मात्र पुर्ण गणना हुन्छ । जनणनामा करिव ४१ लाख कृषक परिवारको सुचिकरण भएको थियो भने, कृषि गणनामा जनगणना बाट प्राप्त कृषक परिवार मध्ये करिव तीन लाख पचास हजार कृषक परिवार वैज्ञानिक विधिबाट छनोट गरी विस्तृत विवरण संकलन गरिन्छ ।

फिल्ड कार्य कहिले हुँदै छ ?

यहि २०७८ चैत्र १ गते सवै ७७ वटै जिल्लाहरूमा कृषिगणना कार्यालय स्थापना गरी आगामि २०७९ को बैशाख ६ र जेठ १९ सम्म सवै ७५३ स्थानीय तहहरूमा छनोटमा परेका कृषक परिवारबाट कृषिगणनाको तथ्याङ्क संकलन कार्य सञ्चालन हुनेछ ।

के कस्ता विवरणहरू संकलन हुँदै छन् ?

राष्ट्रिय कृषिगणना अन्तर्गत कृषक परिवार प्रश्नावली मार्फत कृषक परिवार, कृषि चलन, कृषि कामदार, कित्ताहरूको विवरण र सिँचाई, कित्ता अनुसारका भू–उपयोग, कित्ता अनुसार खेती गरिएका अन्नबाली, कोसेबाली, दलहन, कन्दमूल, तेलबाली, नगदेबाली, मसलाबाली, अन्य तरकारी, फलफूल, बीउविजन विषादि तथा मलखादको प्रयोग, पाल्तु पशुपक्षीको उमेर अनुसारको संख्या, कृषि कार्यमा प्रयोग हुने भवन र संरचना, कृषि औजार, पोखरीको विवरण र माछापालन, मौरी पालन, च्याउ र पुष्पखेती, रेशम खेती, कृषि ऋण, बीमा र अनुदान, कृषिमा वातावरणीय प्रभाव, दैवी प्रकोप, खाद्य पर्याप्तता, महिला र पुरूषको नाममा रहेको कृषि जग्गा र परिवारका अन्य आर्थिक कृयाकलाप सम्बन्धी विवरणहरू संकलन गरिने छन् ।

कृषि कत्ति किसिमको हुन्छन् ?

पारिवारिक कृषि कार्य भनेको मुख्यतः परिवारको उपभोगको लागि अन्न, तरकारी, फलफूल, पशुपन्छीपालन, आदिको कृयाकलापलाई जनाउँछ । व्यावसायिक कृषि भन्नाले दर्ता गरेका वा नगरेका मुख्यतः विक्री प्रयोजनको लागि गरिएका खेतीपाती, पशुपन्छीपालन, माछापालन आदिलाई जनाउँछ । जस्तैः व्यवसायिक रुपमा गरिएका तरकारी खेती, फलफूल खेती, ठूलो संख्या गरिएको कखुरापालन, बाख्रापालन, दूध तथा दूधजन्य उत्पादन बिक्रिको लागि गरिएको गाई भैँसीपालन, आदि पर्दछन् । त्यस्तै संस्थागत कृषिकार्य भन्नाले सरकारी, अर्धसरकारी वा गैरसरकारी फार्महरू पर्दछन् । यसमा सहकारी व्यवस्थापन अन्तर्गत संचालित कृषि फार्महरू पनि पर्दछन् ।

तथ्याङ्क संकलन गर्न को आउछ ?

कृषिगणनाको फिल्डकार्यमा तथ्याङ्क संकलनको लागि छानिएका गणना क्षेत्रहरूमा ५ हजार भन्दा बढी गणकहरू तथ्याङ्क संकलनको लागि घरघरमा आउँछन् । यस कार्यको सुपरिवेक्षण तथा सहजिकरणको लागि करिव १ हजार ३ सय सुपरिवेक्षकहरू गणकसंगै खटिनेछन् जसमा महिला कर्मचारीहरूको उल्लेख्य सहभागिता हुनेछ । ७७ जिल्लामा अस्थायी प्रदेश तथा जिल्ला कृषि गणना कार्यालय खुल्नेछन् ।

कस्तो विधि प्रयोग हुन्छ ?

तथ्याङ्क संकलनमा मिश्रित विधि (कागज र कलम सहितको अन्तर्वाता विधि र ट्याबलेटको प्रयोग गरी) प्रयोग हुनेछ । यी दुबै माध्यमबाट संकलित तथ्याङ्क केन्द्रमा एकत्रित र प्रविष्टि भएपछि परम्परागत र नयाँ प्रविधिकै आधारमा, प्रशोधन, तालिकीकरण, विश्लेषण गरिने छ ।

सरकारलाई के सहयोग पुग्छ ?

राष्ट्रिय कृषिगणनाको नतिजा गापा, नपा, प्रदेश स्तरमा र राष्ट्रिय स्तरमा समेत उपलब्ध हुने भएकोले संघीय, प्रादेशिक तथा स्थानीय निकायको योजना तर्ज‘मा, अनुगमन, मूल्यांकन गर्न सघाउ पुग्दछ । विशेषतः कृषि क्षेत्रको समस्या र कृषकका समस्या पहिचान र तदनुरुपको कार्यक्रमको तर्जुमा गर्न सहयोग पुग्दछ । यसको अतिरिक्त नीति निर्माता, अनुसन्धानकर्ता, विद्यार्थी, संचार जगत आदिको लागि पनि उपयोगी सूचना उपलब्ध हुनेछ ।

खाद्य अप्राप्तताको सम्वोधन हुन्छ ?

नेपालको कृषि प्रणालीमा महिलाको बढ्दो सहभागितालाईृ ध्यानमा राखी महिलाको अगुवाईमा भइरहेका खेतीपातीको विवरण संकलन गरिने छ । महिलाहरूको स्वामित्वमा रहेको कृषि जग्गा, महिलाको कृषिकार्य सम्बन्धी निणर्यमा सहभागिता, महिलाले कृषिकार्यमा दिएको समय आदि विवरणहरू संकलन गरिनेछ । साथै अन्तर्वार्ता कार्यमा महिला सुपरिवेक्षक र गणकहरूको उल्लेख्य मात्रमा सहभागी हुनेछन् । 

कृषि गणनाको नतिजा प्रतिवेदनमा महिला विषयक विश्लेषण सहितको एक छुट्टै प्रतिवेदन समेट प्रकाशन गरिनेछ । यसका साथै संयुक्त राष्ट्र संघको दीगो विकास लक्षका सूचकहरू विशेषतः

भोकमरी, खाद्य असुरक्षा र ग्रामीण गरिवीको अन्त्य संग सम्वन्धित तथ्यांकीय विवरणको छुट्टै विश्लेषण गरिनेछ । साथै सरकारको पन्ध्रौं योजनाको उद्देश्य, लक्ष, र नीतिलाई पनि प्राथमिकतामा राखी कृषिगणनाको अवधारणा, परिभाषा, र निर्देशिका तयार गरिएकोले सोही बमोजिम नतिजा विश्लेषण गरिनेछ ।

कृषकको भूमिका के हुन्छ ?

कृषिगणनाको नतिजा स्थानीय, प्रदेश तथा संघीय सरकार, अनुसन्धानकर्ता, शिक्षक, विद्यार्थी सबैका लागि योजना तर्जुमा, अनुगमन, मूल्यांकन, अध्ययन र अनुसन्धानका लागि महत्वपुर्ण हुने हुदाँ सहि विवरण उपलब्ध गराउनु छानिएका कृषक परिवारको दायित्व हुनेछ भने, कृषि गणनाको महत्व बुझाउने र प्रचार प्रसार गरी गुणस्तरिय तथ्याङ्क संकलन गर्न सहयोग पु-याई कृषिगणना सफल पार्नु सवै समुदाय तथा सवै सर्वसाधारणको कर्तव्य महत्वपूर्ण हुनेछ ।

हतियार बुझाउन निर्देशन

विदुर । जिल्ला प्रशासन कार्यालय नुवाकोटले चैतमसान्तभित्र हातहतियार बुझाउन निर्देशन जारी गरेको छ । प्रशासनले इजाजत प्राप्त हातहतियार नजिकैको प्रहरी चौकीमा बुझाउन सार्वजनिक सूचना जारी गरेको हो ।

नुवाकोटका प्रमुख जिल्ला अधिकारी नारायणप्रसाद रिसालले गृह मन्त्रालयको निर्देशन बमोजिम हातहतियार बुझाउन सूचना जारी गरिएको जानकारी दिएका छन् । स्थानीय तहको निर्वाचनलाई भरपर्दो र विश्वासिलो बनाउन तथा शान्ति सुरक्षा कायम राख्नका लागि जिल्लाभित्र रहेको इजाजत प्राप्त हातहतियार चैत ३० गते भित्र नजिकैको प्रहरी चौकीमा बुझाउन स्थानीय प्रशासनले सबैमा अनुरोध गरेको बताइएको छ ।

यसै बीच, नुवाकोटको किस्पाङ गाउँपालिकाबाट एक जना हतियार सहित पक्राउ परेका छन् । वडा नम्बर ३ किर्नेबगरका ३३ वर्षिय गोम्बो तामाङ समातिएको जिल्ला प्रहरी कार्यालय नुवाकोटले जनाएको छ । गएको आईतवार बिहान सात बजे तामाङलाई आफ्नै घरको पिडिमा बसी भरुवा बन्दुक सफा गरी रहेको अवस्थामा प्रहरीको गस्ती टोलीले फेला पारेको हो । उनीसँग हातहतियार राख्न पाउने कुनै ईजाजत नभएकोले पक्राउ गरी जिल्ला अदालत नुवाकोटमा पेश गरिएको छ । जिल्ला अदालत नुवाकोटले हातहतियार तथा खरखजाना सम्बन्धी कसुर मुद्दामा अनुसन्धान गर्न प्रहरी कार्यलयलाई अनुमती दिएको छ । 

२०७८ साल चैत २१ गतेको सम्पादकीय

 गठबन्धनको दुरगामी महत्व

शुक्रवार राती सम्भवत देशमै जिल्ला स्तरमा सत्तारुढ गठबन्धनका दलहरू स्थानीय तह निर्वाचनमा एकता गरेर जाने सहमती भएको पहिलो खबर बाहिर आयो । नेपाली काँग्रेस, नेकपा माओवादी केन्द्र र नेकपा एकीकृत समाजवादीका जिल्ला प्रमुखहरूले साझा धारणाको विज्ञप्ती जारी गरेर गठबन्धनका लागि प्रक्रिया सुरु भएको जनाउ सहितको घोषणा गरे । त्यसो त विचार मिल्दा राजनीतिक दलका बीचमा एकता हुन्छ, त्यो स्वाभाविक र पक्कै हो । अनि अर्को कुरा सिद्धान्तमा एकरूपता भएका पार्टीबीचको सहमति दिगो हुनसक्छ । तर आदर्श उस्तैउस्तै भएका दलबीचको गठबन्धन दुनियाँले देख्दा पनि नसुहाउँदो मानिँदैन । सिद्धान्त, आदर्श र विचारमा कुनै पनि तादात्म्य नदेखिएका दलको एकता क्षणिक हुने हुँदा तत्कालका लागि ठीक देखिए पनि त्यसको प्रतिफल मिठै हुन्छ भन्न सकिँदैन । तथापी मुलुकमा आइपरेको विकराल समस्यामा भिन्न विचार बोकेका दलका बीचमा सहकार्य हुँदा पनि मुलुकलाई दुर्घटनाबाट जोगाउन सकिने रहेछ भनेर नेपाली काँग्रेसको नेतृत्वमा गरिएको पाँच दलको सहकार्यले भने पुष्टि गर्न थालेको छ । अल्लि कत्ति पुष्ठभूमिलाई हेर्ने हो भने पनि तत्कालिन नेकपा र वर्तमान समयको नेकपा एमालेका अध्यक्ष र उक्त दलले मुलुकलाई भड्खालोमा हाल्ने प्रयास गरेकै हो । संविधान बनाउँदाको सयम पाँच वर्षभन्दा पहिला संसद् विघटन गरिने कार्यलाई दुरुत्साहन गर्ने उद्देश्यले राखिएका प्रावधानलाई लत्याउँदै असमयमै मुलुकलाई पुनः निर्वाचनमा धकेल्ने बदनियत बोकिएकै थियो । अर्बाैं खर्च हुने निर्वाचन पटक पटक गरिनु नेपालजस्तो कम आर्थिक हैसियत भएको मुलुकका लागि हितकर थिएन । र त्यसबाट उत्पन्न हुने राजनीतिक गतिरोध, सन्नाट र अध्यारो युगको सुरुवातलाई अहिलेको सत्ता गठबन्धनले संसद्लाई जोगाएकै हो । राजनीतिक अस्थिरताबाट मुलुकलाई बचाउन वर्तमान गठबन्धन सफल भएको प्रजातान्त्रि र अग्रगामी विचारका सचेत नागरिकहरूमा दुई मत छैन ।

त्यसो त अहिले हुन लागेको चुनावी गठबन्धनको अभ्यास नयाँ र नौलो पक्कै पनि होइन । बाम एकतादेखि माओवादी–काँग्रेस गठबन्धसम्मको अभ्यास भइसकेको छ । अघिल्लो चुनावी गवन्धलाई केलाउने हो भने पनि नेकपा एमाले र नेकपा माओवादी केन्द्र मिलेर चुनावमा जाँदा करिब दुईतिहाइ बहुमत जम्मा भएको थियो । हुन त दुवै कम्युनिस्ट दल नै थिए र उनीहरूका सिद्धान्त, विचार, आदर्श सबै एकैखाले थिए, त्यसैले पनि त्यत्तिको सफलता हात परेको हुनसक्छ । पार्टीका नाम अलगअलग भए पनि उनीहरूका कार्यकर्ताको अध्ययन, प्रशिक्षण र भावना एकैखालको हुने भएका कारण त्यसरी मिलन भएको पनि हुनसक्छ । काँग्रेस र कम्युनिस्ट दलका बीचमा सहकार्य हुँदा कार्यकर्ताका बीचको चारित्रिक भिन्नताका कारण ठ्याक्कै त्यस्तै परिणाम हात लाग्छ कि लाग्दैन त्यो छिट्टै नतिजाको रुपम आउने नै छ । मुलत : राजनीतिक दलको मुख्य कुरा भनेको जनताको सेवा र उन्नत समाज विकास सहितको मुलुक बनाउने नै हो । 

आफ्नो राजनीतिक विचार र आदर्शलाई जनताका बीचमा पु-याएर त्यसैका बलमा सत्तामा पुग्ने र सत्ताका माध्यमबाट देश र जनतालाई समृद्ध बनाउने मूल लक्ष्य नै राजनीतिक दलको हो । सत्तामा पुग्न सकिएन भने जतिसुकै राम्रो सिद्धान्त भए पनि र कार्ययोजना बोकेको भए पनि कार्यान्वयनमा लैजाने अवसर मिल्दैन । त्यसैले चुनावमा विजय हासिल गर्न विचार नमिलेकै दलसँग भए पनि एकप्रकारको तालमेल गर्नुलाई गलत भन्न मिल्दैन । चुनावी तालमेल नगरी अघि बढ्दा बलिदानीबाट प्राप्त संविधानमाथि प्रहार गर्ने नेकपा एमाले नै फेरि काँग्रेसपछिको शक्तिशाली दल बन्ने र मुलुकको समस्या जस्ताको त्यस्तै रहनेछन् । नेकपा एमालेको अहम् र अधिनायकवादको यात्रालाई पूर्णविराम लगाउन पनि एमालेलाई साइजमा ल्याउनुपर्ने बाध्यता भएका कारण गठबन्धनको महत्व देखिन्छ ।

२०७८ साल चैत २१ गते । वर्ष : १५, अंक : २६ ।

 

म्यादी प्रहरी नेताको टाउको दुखाई

२०७३ मा म्यादी प्रहरीमा छनोट भएका नुवाकोटका युवाहरू । फाइल तस्बिर

विदुर । यस अघि आफ्ना कार्यकर्तालाई जागिर खुवाउन दवाद दिएर फोन गर्ने राजनीति दलका नेताहरूलाई अहिले म्यादी प्रहरी टाउको दुखाई बनेको छ । स्थानीय तह निर्वाचनमा गाउँटोलमै खटिनुपर्ने र पार्टीलाई मतदान गर्नुपर्ने युवाहरू म्यादी प्रहरी बन्नका लागि सिडिओ र एसपीलाई फोन गदिर्नु पर्यो भन्दै आउन थालेपछि नेताहरू अप्ठ्यारोमा परेका हुन् । ‘चुनावी कार्यक्रम लिएर खटिनुपर्ने युवाहरू म्यादी पुलिस बन्नुपर्यो भन्दै फोन गराउन आउछन्’, एक नेताले भने– ‘स्थानीय तहमा दुई चार भोटले हार्ने अवस्था आउछ यसरी जागिर खान जानु हुँदैन भन्ने गरेको छु, तर रिसाएर फर्कन्छन् ।’

नेताहरू विपक्षी पार्टीका युवाहरू मात्रै म्यादी प्रहरीमा गईदिए हुन्थ्यो भन्ने चाहन्छन् । आफ्ना कार्यकर्ताहरू म्यादी प्रहरीको फारम भर्न विदुर झर्न थालेको जानकारी पाएपछि काँग्रेस, माओवादी केन्द्र, एमाले लगायतका ठुला पार्टीहरूले समेत रोक्नका लागि सकुर्लर नै जारी गरेको थियो । ठुला पार्टीका जिल्ला नेताहरूले म्यादी प्रहरी बनाउन आफ्ना मान्छेका लागि फोन गर्ने काम बन्द गरेका छन् । जिल्ला प्रहरी कार्यालय नुवाकोटका एक अधिकृतका अनुसार म्यादी प्रहरी भर्नाका लागि नेताहरूको फोन र दवाव कम आउने गरेको छ । अघिल्लो निर्वाचनको अनुभवका आधारमा उनले भने– ‘बरु सेना, प्रहरीबाट रिटायर भएका, पूर्व वन रक्षकहरूले चाही बढी बल गर्ने गरेका छन् ।’

म्यादी प्रहरीको लागि आवेदन लिन आउनेमा दुधे बालकका आमाहरू सम्म छन् । ४० दिनको काममा राम्रो रकम हात पर्ने भएकोले आफु आकर्षित भएको बेलकोटगढी नगरपालिकाका एक महिलाले बताए । ‘अब दुध छुटाउने बेलापनि भएको छ, घरमा बच्चा हर्ने मान्छे छन्, मैले जागिर पाए भने पनि कुनै समस्या हुँदैन’ ति महिलाले भने । 

त्यसो त, म्यादी प्रहरीका लागि सामान्य लेखपढ गर्न सक्ने र नेपाली नागरिकता भएका व्यक्तिले आवेदन दिन पाउनेछन् । तर सामान्य लेखपढ गर्ने आवेदकको संख्या अत्यन्त न्यून भएको एक प्रहरीले बताएका छन् । ‘हामीकहाँ प्रहरी निरीक्षक तहमा भिड्न योग्य मान्छेको आवेदन परिरहेको छ’, उनले भने । म्यादी प्रहरीको आवेदन दिनेहरूमा स्नातक तह उत्तीर्ण गरेकाको समेत आवेदन परेको नुवाकोटका एसपी  रामप्रकाश शाहले बताए । विविएस उत्र्तिण गरेका विदुर नगरपालिकाका एक युवाले आफुले पनि म्यादी प्रहरीका लागि आवेदन दिएको सुनाए । ‘विदेशमा सेक्युरिटको काम गर्थें, केही समय भयो घर आएको’, उनले भने– ‘अझ केही समय यता बस्ने भएपछि दुई÷चार पैसा किन छाड्नु भनेर म्यादी प्रहरीका लागि फारम भरेको हुँ ।’

म्यादी प्रहरीमा भर्ना हुन नुवाकोटको सबै स्थानीय तहबाट युवाहरू आएका छन् । कुन पालिकाबाट कत्तिजनाको आवेदन पर्यो भन्ने चाँही जिल्ला प्रहरी कार्यालय नुवाकोटले तथ्याङ्क तयार गरेको छैन । पछिल्लो समयको बढ्दो बेरोजगार, गाउँ–गाउँमा रहेका युवा तथा अवकाशप्राप्त सेना, प्रहरी म्यादीमा आकर्षित भएका हुन् । 

अहिले आवेदन लिने र पछि छनोटमा प्राप्त अंकका आधारमा भर्ना गरिने प्रमुख जिल्ला अधिकारी एवं म्यादी प्रहरी छनोट समितिका संयोजक नारायणप्रसाद रिसालले बताएका छन् । म्यादी प्रहरीमा भर्ना हुनेले करीब दुई महिना समय बर्दीमा बिताउनेछन् । बैशाख ३० गते हुने स्थानीय तह निर्वाचनका लागि गएको आइतबारदेखि ११ गतेसम्म नुवाकोटमा ३ हजार ५८१ जनाले आवेदन दिए । ११ गते आवेदन दिने अन्मित मिति थियो । नुवाकोटका लागि एक हजार ३२७ जना मात्रै म्यादी प्रहरी माग छ । 

४० दिन काम गरेको तलव र भत्ता गरेर एक व्यक्तिले ४३ हजार ३४० रुपैयाँ एकुमष्ठ बुझ्छन् । दिनको ७५६ रुपैयाँका दरले तलब पाउने छन् । ४० दिनको सात हजार रुपैयाँ रासन भत्ता, पोसाक भत्ता ६ हजार र एक हजार रुपैयाँ यातायात खर्च उपलब्ध गराइनेछ । छनोट भएका म्यादी प्रहरीलाई सात दिन तालिम दिएर निर्वाचनको सुरक्षामा खटाउने छ । 

म्यादी प्रहरी भर्ना गर्न प्रमुख जिल्ला अधिकारी नारायणप्रसाद रिसालको संयोजकत्वमा ६ सदस्यीय समिति गठन भएको छ । चैत ११ गतेसम्म १८ वर्ष पूरा भएका र ५४ वर्ष ननाघेका नेपाली नागरिक भर्ना हुन पाउनेछन् । 

स्वास्थ्य मापदण्ड प्रहरी जवानसरह हुने छ । म्यादीका आवेदक कुनै पनि नैतिक पतन देखिने फौजदारी कसुरमा दोषी नठहरिएको, राजनीतिक दलको सदस्यता नलिएको, शारीरिक तथा मानसिक रूपमा तन्दुरुस्त, साधारण लेखपढ गर्न जान्ने, आँखाको दृष्टि माइनस वा प्लस २ भन्दा कमजोर नभएको, उचाइ पुरुषको पाँच फिट दुई इन्च र ५० केजी तौल, महिलाको हकमा पाँच फिट उचाई र तौल कम्तीमा ४२ केजी हुनुपर्ने छ । नेपाली सेना, नेपाल प्रहरी र सशस्त्र प्रहरी बल (एपिएफ) बाट उपदान÷निवृत्तिभरणमा निस्किएका पूर्वसुरक्षाकर्मी, पूर्व वन रक्षक, विदेशस्थित सुरक्षा निकायबाट अवकाश/उपदानमा निस्किएका, यसअघि म्यादीमा काम गरेका र २०७८ साउनदेखि सुरक्षा निकायमा भर्ना आवेदन दिई शारीरिक तन्दुरुस्ती र स्वास्थ्य परीक्षणमा उत्तीर्णलाई म्यादी छनोटमा प्राथमिकता दिइने मापदण्ड छ । 

हराएको सहकारी खोज्दै वडा अध्यक्ष

नुवाकोटको विदुर नगरपालिका वडा नं. ४ मा हुनु पर्ने शुक्रपथ बहुउद्देश्यीय सहकारी संस्था लिमिटेड (काठमाडौं) वडा नं. २ मा फेला परेको छ । तस्बिर : इमेज साप्ताहिक

विदुर । विदुर नगरपालिका वडा नं. ४ का अध्यक्ष टलकमान श्रेष्ठलाई केही समयदेखि मौखिक उजुरी आइरहेको छ : ‘हाम्रो वडामा शाखा खोल्ने गरी काठमाडौंबाट एउटा सहकारी आएको थियो, त्यो खोई ? त्यसको कार्यालय कहाँ छ ?’ सुरुमा सहकारीको कार्यालय खोज्दै के हिड्नु भनेर पन्छिएका वडा अध्यक्ष श्रेष्ठले गुनासो बढ्दै गएपछि अनौपचारिक रुपमा सोधिखोजी थाले । बागमती प्रदेशको सहकारी महाशाखाबाट अनुमती लिएर काठमाडौंको एक सहकारी विदुर–४ मा स्थापना हुनुपर्ने जानकारी पाएपछि सहकारीको खोजी थालेका वडा अध्यक्ष श्रेष्ठ त्यत्तिखेर चित परे, जत्तिबेला त्यो सहकारी वडा नंं. २ मा फेला पारे । 

काठमाडौं न्यूरोडमा प्रधान कार्यालय रहेको शुक्रपथ बहुउद्देश्यीय सहरकारी संस्था लिमिटेड नुवाकोटमा शाखा स्थापना गर्ने गरी वडा नं. २ को बट्टारमा भेटिएको छ । तै पनि वडा नं. ४ का अध्यक्ष अझै पनि अर्को सहकारी पो हो की आफ्नोे वडामा स्थापना हुने चाँही भनेर खोजी गरिरहेका छन् ।  

यही विषयमा जानकारी लिन आइतवार सो सहकारीको कार्यालयमा पुगेको इमेज प्रतिनिधिलाई  सेवा केन्द्रका प्रबन्धक जयबहादुर थापाले पुष्टि गरे । ‘हामीलाई विभागले विदुर नगरपालिकाको वडा नं. ४ को लागि नै स्विकृत दिएको हो, तर हामी वडा नंं .२ मा बसिरहेका छौं’ उनले भने । यस विषयमा वडा नं.४ का अध्यक्ष श्रेष्ठले पनि अनौपचारिक रुपमा सुनेको र वडा नं. २ मा स्थापना भएको सहकारी भएकोले केही सोधिखोजी गर्न नमिलेको बताएका छन् । ‘बट्टार चोकमा पुगेर यसो साइनबोर्ड पढ्यो कार्यालयको ठेगाना वडा नं. २ लेखेको छ, मेरो वडाबाट हराएको सहकारी यही हो भनेर दावी गर्न मिल्यो त अब ?’ श्रेष्ठले भने । 

वडा नं. २ का अध्यक्ष बिरेन्द्रकुमार शाही भने आफ्नो वडाका कुनै सहकारीले शाखा स्थापना गरेको र सदस्य बनाएर बचत संकलन गर्ने अनुमती लिएको जानकारी नभएको बताउछन् । ‘मलाई त यो बारेमा कसैले केही पनि भनेन् त’ शाहीले भने । अझ उनले शुभप्रभात नाम गरेको सहकारी आफ्नो वडामा रहेको स्मरण गर्दै प्रश्न गरे– ‘शुक्रपथ भन्या की शुभप्रभात ? शुभप्रभात सहकारी चाँही छ २ नं. मा ।’ 

विदुर नगरपालिका सहकारी शाखामा समेत यो सहकारीको विवरण भेटिएको छैन । शाखा प्रमुख पुष्कर शर्मा रिमालले त्यस्तो नाम गरेको कुनै सहकारी विदुर नगरपालिकाभित्र स्थापना भएको जानकारी कार्यालयसंग नभएको बताए । ‘हाम्रो कार्यालयको रेकर्डमा त्यो नाम गरेको सहकारी देखिदैन’ रिमालले भने ।  

यो सहकारीले २०७८ असोज ६ गतेबाट नुवाकोटमा कारोवार गर्दै आएको छ । साढे छ महिनादेखि काम गरिरहेको यो सहकारीले आफ्नो कार्यक्षेत्र नुवाकोट जिल्लाभरी रहेको दावी गरेको छ । ‘काम गर्न थालेको साढे छ महिना हुनै लाग्यो, तर यहाँ हामी दर्ता हुन भने बाँकी छ’ सेवा केन्द्र प्रवन्धक थापाले भने । 

तीन हजार मेगावाट बिजुली आदानप्रदान हुनसक्ने

विदुर । नेपाल र चीनबीच विद्युत् आदानप्रदानका लागि महत्वपूर्ण मानिएको रातमाटे–रसुवागढी–केरुङ अन्तरदेशीय प्रसारण लाइनले तीन हजार मेगावाट बराबरको बिजुली आदानप्रदान गर्नसक्ने अनुमान गरिएको छ । विद्युत् विकास विभागबाट पाँच हजार मेगावाट क्षमता बराबरको बिजुली प्रवाहका लागि अनुमति पाए पनि ‘लोड फ्लो’ अध्ययन गर्दा पहिलो चरणमा तीन हजार मेगावाट बराबरको बिजुली आदानप्रदान गर्न सकिने देखिएको हो । अध्ययनअनुसार सो प्रसारण लाइन उच्च क्षमताको हुनेछ ।

आगामी भदौसम्म वातावरणिय प्रभाव मूल्याङ्कनको काम सकेर प्रसारण लाइन निर्माणमा जान सकिने बताइएको छ । नेपाल विद्युत् प्राधिकरणको सहायक कम्पनी एनइए इन्जिनियरिङ कम्पनीले वातावरणीय प्रभाव मूल्याङ्कनको काम गरिरहेको छ । आयोजना प्रमुख कोमलनाथ आत्रेयका अनुसार रातमाटे–रसुवागढी–केरुङ अन्तरदेशीय प्रसारण लाइन नाम दिइएको सो आयोजनाको नेपालतर्फको क्षमता ४०० केभी डबल सर्किटको हुनेछ । यस्तै चीनतर्फ भने ५०० केभी डबल सर्किटको हुनेछ । सो आयोजनामा प्राधिकरणको आयोजना विकास विभागले काम गरिरहे पनि नेपाल र चीनका संयुक्त प्राविधिक समूहको बैठक बस्न नसक्दा विस्तृत परियोजना प्रतिवेदन (डिपीआर)मा बाँकी रहेका केही काम सम्पन्न हुन सकेको छैन ।

पछिल्ला दिनमा कोरोनाका कारण केही जटिलता पैदा भए पनि सहजरुपमा दुई देशबीचको नाका सञ्चालनमा आउन नसक्दा ज्वाइनट क्रसिङ प्वाइन्ट’ का विषयमा टुङ्गो लगाउन सकिएको छैन । दुवै देशका प्राविधिकले स्थलगतरुपमा अध्ययन गरेर सम्पन्न गर्न‘पर्ने काम बाँकी रहेकाले संयुक्त रूपमा ‘लोड फ्लो टेस्ट’ र डीपीआरको काम भने हुन सकेको छैन । नेपालतर्फको काम भने अन्तिम चरणमा पुगे पनि संयुक्तरुपमा गर्नुपर्ने काम कोरोनाको असर कम हुँदै गएपछि अगाडि बढ्ने विश्वास लिइएको छ ।

चिनियाँ पक्षले जिलोङ काउन्टीमा सवस्टेशन निर्माण गरिरहेको जानकारी नेपाली पक्षलाई गराएको छ । केरुङसमेत सोही काउन्टीमा पर्छ । नेपालतर्फ यसअघि नै लोडफ्लो टेस्टको काम सकिए पनि संयुक्त लोडफ्लोको काम गर्न बाँकी छ । सो काम स्टेट ग्रिड अफ चाइनाले गर्र्नेछ । नेपालतर्फको अध्ययनअनुसार अन्तरदेशीय प्रसारण लाइन निर्माण भएपछि नेपाल र चीनबीच तीन हजार मेगावाट बराबरको बिजुली आयात निर्यात गर्न सकिन्छ । आयोजनामा कूल २०८ टावर रहनेछ । प्रसारण लाइनको नेपालतर्फको खण्ड ७० किलोमिटर बराबर छ । प्रसारण लाइनको लागत रु १० अर्ब बराबर रहने प्रारम्भिक अनुमान छ ।

नुवाकोटको रातमाटेदेखि रसुवागढीसम्म निर्माण हुने नेपालतर्फको प्रसारण लाइन लाङटाङ राष्ट्रिय निकुञ्जभित्र भएर जान्छ । आयोजनाले निकुञ्जभित्र र बाहिर दुवैतर्फ अध्ययन गरेको आयोजना प्रमुख आत्रेयको भनाइ छ । सो प्रसारण लाइन निर्माण भएपछि नेपाल, चीन र भारतबीच विद्युत् आयात निर्यातका लागि त्रिदेशीय मार्गसमेत खुल्छ । सरकारले अगाडि सारेको १० हजार १५ हजार मेगावाट बिजुली उत्पादन गर्ने लक्ष्यलाई साकार पार्न पनि सो प्रसारण लाइन महत्वपूर्ण मानिएको छ । हाल भारतसँग ११ वटा सम्पर्क बिन्दुमार्फत बिजुली आयात निर्यात भइरहे पनि चीनतर्फ भने कुनै पनि प्रसारण सम्पर्क सञ्जाल बन्न सकेको छैन । नेपालले प्रस्ताव गरेअनुसार वान बेल्ट वान रोड परियोजनामा सो प्रसारण लाइनसमेत समावेश छ ।

यतिबेला भारत मात्रै होइन, संसारभर नै कोइलाको बजारमा सङ्कट पैदा भएको छ । यस्तो अवस्थामा स्वच्छ र हरित ऊर्जा उत्पादन हुने नेपालका लागि महत्वपूर्ण अवसरको ढोका खुल्नेछ । आयोजना प्रमुख आत्रेय प्रसारण लाइन नेपालकै लागि महत्वपूर्ण भएको बताउछन् । ल्हासामा दुई वटा प्रसारण प्रणालीबाट बिजुली आयात भइरहेको छ । सिचुवानबाट आएको बिजुली दुई हजार किलोमिटर लामो प्रसारण लाइन प्रवाह भएको छ । यस्तै चाङ्घाईबाट आएको बिजुली एक हजार ४०० किलोमिटर लामो प्रसारण लाइनमार्फत प्राप्त भएको छ । नेपालतर्फबाट प्रसारण प्रणाली जोड्दा झण्डै ९०० किलोमिटर हाराहारी हुने भएकाले तिब्बतमा बिजुली प्रवाह गर्न सहज हुने देखिन्छ । चीनतर्फ जग्गा प्राप्ति, वातावरणीय प्रभाव मूल्याङ्कन तथा अन्य कुनै पनि प्रकारको प्राविधिक समस्या नहुने भएकाले एकाध वर्षमा नै सयौँ किलोमिटर प्रसारण लाइन निर्माण हुन सक्छ ।

रेलमार्गका लागि अपरिहार्य

चीनबाट नेपालमा ल्याइने भनिएको रेलमार्ग निर्माणका लागि समेत प्रसारण लाइन उत्तिकै महत्वपूर्ण छ । नेपालमा चल्ने भनिएको रेल विद्युतीय हुने भएकाले रेलमार्गको काम सुरु हुनुभन्दा पहिल्यै प्रसारण प्रणाली निर्माण भइसक्नुपर्नेछ । जानकारहरूका अनुसार चीनबाट आउन भनिएको रेल विद्युतीय हो । रेल आउनुभन्दा दुई वर्ष पहिले नै प्रसारण लाइन बनाइसक्नुपर्छ । त्यसका लागि बिजुलीको असाध्यै राम्रो आपूर्ति हुनुपर्छ । ‘यो प्रसारण लाइन नबनी नेपालमा रेल आउनै सक्दैन’, अमेरिका, युरोप र चीनमा समेत रेल आउनुभन्दा पहिल्यै बिजुलीको प्रसारण प्रणाली निर्माण गरिएको हुन्छ ।

नेपालको ऊर्जा सुरक्षा, प्रसारण प्रणालीको विविधिकरणका अलावा रेलका लागि समेत यो प्रसारण लाइन आवश्यक रहेको आयोजना प्रमुख आत्रेयको भनाई छ । नेपालतर्फको अध्ययनमा लाङटाङ राष्ट्रिय निकुञ्जका तर्फबाट असाध्यै ठूलो सहयोग प्राप्त भएको आयोजनाले जनाएको छ । नेपालको विद्युत् आदानप्रदान तथा क्षेत्रीय बजारमा पहुँचका लागि महत्वपूर्ण मानिएका अन्तरदेशीय प्रसारण लाइनको निर्माणलाई सरकारले उच्च प्राथमिकतामा राखेको छ । चिनियाँ राष्ट्रपतिको नेपाल भ्रमणका क्रममा समेत सो प्रसारण लाइन निर्माणका बारेमा चर्चा भएको थियो ।

प्राधिकरणका कार्यकारी निर्देशक कुलमान घिसिङ र चीनको स्टेट ग्रिडका कार्यकारी निर्देशक कोउ वीले २०७५ असार ६ गते बेइजिङमा नेपाल चीन पावर ग्रिड इन्टरकनेक्सनअन्तर्गत सो प्रसारण लाइनको अध्ययनसम्बन्धी सम्झौतामा हस्ताक्षर गरेका थिए । चीन सरकारले अगाडि सारेको बीआरआईमा सन् २०३० सम्म सातवटै महादेशमा प्रसारण लाइन विस्तार गर्ने नीति छ । सोहीअनुसार दुई देशबीच प्रसारण लाइन जोड्ने र त्यसबाट भारत तथा अन्य मध्य एशियाली मुलुकलाई समेत आबद्ध गर्न सकिन्छ । नेपालतर्फ नुवाकोटको रातमाटे वा प्राधिकरणको त्रिशुलीमा रहेको जग्गामा सवस्टेशन निर्माण हुनेछ ।

भारततर्फ ढल्केबर–मुजफ्फरपुर अन्तरदेशीय प्रसारण लाइन निर्माण भई सञ्चालनमा आइसकेको छ । यस्तै दोस्रो न्यू बुटवल गोरखपुर अन्तरदेशीय प्रसारण लाइन निर्माणका लागि आवश्यक प्रक्रिया सुरु भइसकेको छ । प्राधिकरणले रक्सौल–परवानीपुर, कुशाहा–कटैया, रामनगरलगायत विभिन्न ११ स्थानबाट बिजुली ल्याए पनि चीनतर्फ भने एउटा पनि प्रसारण प्रणाली निर्माण भएको छैन ।

अमेरिकी सहयोग सम्झौता एमसिसीले पनि नुवाकोटको रातमाटेमा नै सवस्टेशन निर्माण गर्ने तयारी थालेको छ । नेपालले प्रसारण लाइनमा सहयोग उपलब्ध गराइदिन चीन सरकारसँग यसअघि नै आग्रह गरिसकेको छ । चीनसँग विद्युत् आदानप्रदानका लागि रसुवागढी–केरुङ प्रसारण लाइनका अलावा तातोपानी, कोरला, किमाथाङ्कालगायत स्थानबाट पनि प्रसारण प्रणाली एक आपसमा जोड्ने चर्चा भइरहेको छ । 

केन्द्रीय कारागार निर्माण अन्तिम चरणमा

विदुर । नुवाकोटको विदुर नगरपालिका– ६ खम्पाक्याम्पमा निर्माण भइरहेको केन्द्रीय कारागारको निर्माणकार्य अन्तिम चरणमा पुगेको छ । 

गृह मन्त्रालयअन्तर्गतको कारागार व्यवस्थापन विभागले एक हजार कैदीबन्दी कारागारमा राख्ने तयारी अनरूप प्राविधिक तथा सुरक्षा व्यवस्थासम्बन्धी अनुगमन गत हप्ता गरेको थियो । कारागार निर्माणकार्य अहिले तीव्र गतिमा अगाडि बढिरहेको छ । जिल्ला कारागार कार्यालय नुवाकोटका प्रमुख गंगालाल योगीले निर्माणाधीन कारागारको भौतिक पूर्वाधार निर्माणतर्फ ९० प्रतिशत काम सम्पन्न भई सुरक्षा व्यवस्था तथा प्राविधिक सुधारका कार्य चरणबद्ध रूपमा भइरहेको जानकारी दिएका छन् । 

उनका अनुसार चैत मसान्तसम्ममा काम सक्नुपर्ने भए पनि एउटा युनिटको दुई ब्लकमा पाँच÷पाँच सय कैदी राख्ने गरी निर्माणकार्य भइरहेको छ । करिब ५४० रोपनी क्षेत्रफलमा फैलिएको कारागार चरणबद्ध रूपमा सञ्चालनमा आउन लागेको छ । सिसी क्यामेरा, तारबार, कर्मचारी आवासगृह, सुरक्षा पोस्ट, भेटघाट कक्ष कानुनी परामर्श कक्ष आदि निर्माण भइरहेको छ । 

कारागार प्रमुख योगीका अनुसार पहिलो चरणमा काठमाडौंको सुन्धारामा रहेको जगन्नाथ देवल र डिल्लीबजार सदरखोर कारागारबाट एक हजार कैदीबन्दीलाई नुवाकोट ल्याउने तयारी छ । गत हप्ता भवन विभाग, कारागार विभागका प्रतिनिधि र नुवाकोटका प्रमुख जिल्ला अधिकारीले ठेकेदार कम्पनीसँग छलफल गरेर कार्य प्रगति साप्ताहिक रूपले बुझाउने सहमति भएको छ । 

निर्माणकार्यका लागि आवश्यक सहयोग भवन विभाग, कारागार विभागका प्रतिनिधि र नुवाकोटका प्रमुख जिल्ला अधिकारीले सहयोग र सहजीकरण गर्ने प्रतिबद्धता जनाएका छन् । माघ मसान्तभित्रै नवनिर्मित कारागार सञ्चालन ल्याउने योजना भए पनि कोरोना संक्रमण महामारीका कारण दुई महिना ढिलो भएको छ । सहरी विकास विभाग, कारागार विभाग र सुरक्षा निकायबीच सुरक्षा व्यवस्था तथा संरचना निर्माणसँग सम्बन्धित केही विषयमा समन्वय हनु नसकेकाले थप सुधारका काम पनि जारी रहेको कारागार व्यवस्थापन विभागका प्रमुख जनकराज दाहालले जानकारी दिए । 

निर्माणाधीन खम्पाक्याम्प कारागारमा झन्डै सात हजार कैदीबन्दी राख्ने क्षमताको संरचना निर्माण भइरहेको छ । नवनिर्मित कारागार कालकोठरी जस्तो नभई सीप विकास केन्द्र, हस्तकला उत्पादन कारखाना र असल नागरिक बनेर पुनः समाजमा फर्किने वातावरणमैत्री ढङ्गले निर्माण गरिएको छ । 

   अस्पताल, पुस्तकालय, व्यायामशाला, योगशाला, ध्यान केन्द्र, सीप तालिम केन्द्र र हस्तकला बिक्री– वितरणलगायत विभिन्न कक्षसहितका सुविधा उक्त कारागारमा हुनेछ । उक्त कारागारमा अपाङ्ग तथा ज्येष्ठ नागरिकमैत्री, अपराधको प्रकृतिअनुसार छुट्टाछुट्टै भवन र प्रजनन अधिकारबाट वञ्चित दम्पती कैदीबन्दीको अधिकारलाई समेत सुनिश्चित गरी आवास कक्ष निर्माण गरिएको छ । 

‘जसको लागि बनेको हो उसलाई अविछिन्न सेवा दिनु’

शिवपुरी । पूर्व राष्ट्रपति डा. रामवरण यादवले शनिवार शिवपुरी गाउँपालिकाको प्रशासकीय भवनको उद्घाटन गरेका छन् । कार्यक्रममा बोल्दै प्रमुख अतिथि डा. यादवले नयाँ भवनबाट शासन नभएर सेवा दिन आग्रह गरे । जसका लागि भनेर भवन बनेको हो उसैका लागि सेवा दिनुपर्ने उनले बताए । शिवपुरीमा आएर शितलता महसुस गरेको बताउँदै डा. यादवले चुरे दोहन रोकिनुपर्नेमा जोड दिए । यहि क्रममा चुरेको नाश हुने हो भने तराई मरुभूमिमा परिणत हुने उनको भनाई थियो । 

सुविधासम्पन्न प्रशासकीय भवन उद्घाटन कार्यक्रममा बोल्दै पूर्व मन्त्री तथा नेपाली काँग्रेसका नेता डा. रामशरण महतले गाउँपालिकामा भएका योजना सम्पन्न गर्ने तर्फ ध्यान दिन आग्रह गरे । उनले देशको अर्थतन्त्र राम्रो बनाउन कृषि,  जलविद्युत उत्पादन वृद्धि गर्नुपर्ने बताए । 

पूर्व मन्त्री तथा नेपाली काँग्रेसका केन्द्रीय सदस्य अर्जुननरसिंह केसीले शिवपुरी पर्यटकीय दृष्टिकोणले महत्वपूर्ण ठाउँ रहेको बताए । नेतृत्वमा बस्नेले विचार नमिल्नेहरूको पनि कुरा सुनेर सबैलाई मिलाउनुपर्ने केसीले बताए । 

पूर्व मन्त्री तथा नेपाली काँग्रेसका प्रवक्ता डा. प्रकाशशरण महतले नेपाली काँग्रेसको लक्ष्य सुशासन हो भन्दै सबै जनतालाई पक्षपात नगरी बराबरी सेवा दिन आग्रह गरे । २०४६ सालपछि नेपाली कांग्रेसको नेतृत्वमा धेरै विकास भएको उनले बताए । स्थानीय समस्या स्थानीय स्तरमै समाधान गर्न स्थानीय सरकार गठन भएको बताउँदै डा. महतले शिवपुरी गाउँपालिकाका अध्यक्ष रामकृष्ण थापाले निकै राम्रो काम गरेको भन्दै प्रशंसा गरे । 

बागमती प्रदेशका उपसभामुख राधिका तामाङले निष्पक्ष ढंगले सेवा प्रवाह गर्न सबै कर्मचारीहरूलाई आग्रह गरिन् । अब चाँडै स्थानीय तहको निर्वाचन आएकाले जनप्रतिनिधि परिवर्तन भए पनि कर्मचारी परिवर्तन नहुने भन्दै उनले सेवा प्रवाहमा कमीकमजोरी नगर्न सचेत गराईन् । 

संविधानसभा सदस्य तथा नेपाली कांग्रेस नुवाकोटका पूर्व सभापति जगदिश्वरनरसिंह केसीले कम्युनिष्ट सरकार भ्रष्टाचारमा लिप्त हुनाले नेपाली जनताले दुःख पाएको बताए । उनले नेताहरू सम्वृद्ध बनेको तर जनताले सुखको अनुभूति गर्न नपाएको जिकिर गरे । 

शिवपुरी गाउँपालिकाका अध्यक्ष रामकृष्ण थापाले आफ्नो कार्यकालमा भएका प्रगतीबारे प्रकाश पारे । उनले प्रशासकीय भवनसँगै वडा भवन निर्माण, १० शैयाको आधारभूत अस्पताल निर्माण, कृषि रिङरोड निर्माण, शिवपुरी शित भण्डार निर्माण, कृषि उपज केन्द्र निर्माण लगायत अन्य प्रगतिबारे ३९ बुँदामा प्रष्ट्याए । उनले शिवपुरीमा निर्माण भएका सबै भवनको जग्गा निःशुल्क प्राप्त भएको बताए ।

प्रशासकीय भवन उद्घाटन कार्यक्रममा नेकपा एमाले जिल्ला अध्यक्ष तथा पूर्व प्रदेश मन्त्री बद्री मैनाली, जिल्ला समन्वय समितिका प्रमुख सन्तमान तामाङ, उपप्रमुख अप्सरा थापा, शिवपुरी गाउँपालिकाका उपाध्यक्ष मञ्जु केसी, नेपाली कांग्रेस नुवाकोटका सभापती रमेश महत, नेकपा एकिकृत समाजवादीका नुवाकोट जिल्ला सचिव पदम उप्रेती लगायत अन्यले बोल्दै नयाँ प्रशासकीय भवन उद्घाटन भएकोमा शुभकामना दिए । 

प्रशासकीय भवन, शिवपुरी आधारभूत अस्पताल भवन, कृषि उपज केन्द्र, कोल्ड स्टोर लगायत अन्य स्थानमा जग्गादान गर्ने, शिवपुरी गाउँपालिकामा जन्मिएका पूर्व विशिष्ट राष्ट्रसेवकहरू, पूर्व प्रमुख प्रशासकीय अधिकृत, भवन निर्माण गर्ने निर्माण व्यवसायी र इन्जिनियरलाई सम्मान गरिएको थियो । 

पुर्व जिविस सभापति पाण्डेको शालिक अनावरण

खरानीटार । जिल्ला विकास समिति (जिविस) नुवाकोटका पुर्व सभापति स्वर्गिय गोबिन्दप्रसाद पाण्डेको स्मृतिमा निर्माण भएको भवन तथा उनको शालिक नेपाली काँग्रेस केन्द्रिय सदस्य डा. रामशरण महतले अनाबरण शुक्रवार खरानीटारमा अनावरण गरेका छन् । 

तादी गाँउपालिका वडा नम्बर ३ खरानीटारमा निर्माण भएको भवन र शालिकको अनाबरण भएको हो । २०१४ सालबाट नेपाली काँग्रेसमा क्रियाशिल रहेका पाण्डे २०१८ देखि दश बर्षसम्म खरानिटार गाँउ पञ्चायतको प्रधानपञ्च थिए । उनकै सक्रियतामा २०२४ सालमा अमरज्योती निमाविको स्थापना भएकोले सोही विद्यालय परिषरमा पाण्डेको स्मृति भवन र शालिक स्थापना भएको छ । 

पाण्डे २०२८ सालदेखि २०३३ सालसम्म नुवाकोट जिल्ला पञ्चायतको उपसभापति, २०३९ सालमा जिल्ला पञ्चायत सभापति निर्वाचित भएका थिए । उनी २०४९ सालको स्थानिय निकायको निर्बाचनमा खरानीटारमा गाबिस अध्यक्षमा समेत निर्बाचित भएका थिए । कृषि बिकास बैंकको सञ्चालक समिति सदस्यमा ५ बर्षसम्म रहेर उनले काम गरेका थिए । स्वर्गिया पाण्डे तत्कालिन राजा बिरेन्द्रबाट सुप्रबल गोरखा दक्षिणबाहु चौथोद्धारा सम्मानित भएका थिए । उनको २०६३ साल बैशाख २८ गते देहबसान भएको थियो ।

गोबिन्दप्रसाद पाण्डे स्मृति भवन तथा शालिकको अनाबरण कार्यक्रममा उनका पुत्र एवं तादी गाँउपालिकाका अध्यक्ष नारायणप्रसाद पाण्डेले बुवाले सुरुवात गरेको स्कुलमा स्मृतिमा भवन निर्माण तथा शालिक निर्माण गरेको बताए । आफ्नै पवरिवारबाट संकलन भएको रकमले उनको स्मृतिलाई ताजा बनाईराख्न भवन निर्माण र शालिक राखिएको उनको भनाई रहेको छ । 

शालिक अनाबरण गर्दै डा. महतले स्वर्गिय पाण्डेलाई स्मरण गर्दै कुशल राजनितिज्ञ र निर्भिक ब्यक्तिको रुपमा रहेको बताए । समाज परिबर्तन, सुुधार र ग्रामिण भेगका नागरिकहरूको जिबनस्तर उकास्नको निमित्त उनले जीबन समर्पण गरेको बताउदै तत्कालिन समयमा नुवाकोटको अबिभाबको रुपमा पाण्डे रहेको महतले बताएका छन् । पाण्डेको सामाजिक योगदान नरहेको भए नुवाकोटको पुर्वी क्षेत्रको सर्वाङ्गिण क्षेत्र नै पछाडी पर्ने महतको तर्क रहेको छ । 

सोही कार्यक्रममा नेपाली काँग्रेस केन्द्रिय सदस्य अर्जुननरसिङ केसीले तत्कालिन समयमासँगै रहेर काम गरेको समरण गर्दै गोबिन्दप्रसाद पाण्डेको वाक कला र सामाजिक कार्यबाट आफु प्रभाबित भएको बताए । नागरिकहरूको सेवामा सक्रिय रहदै लाभको पदमा बस्न नचाहने तर समाज परिबर्तनको संबाहको रुपमा आफुलाई उभ्याउन सफल ब्यक्तिको रुपमा स्वर्गिय पाण्डे रहेको केसीले बताएका छन् । 

कार्यक्रममा नेपाली काँग्रेस नुवाकोटका निबर्तमान सभापति जगदिश्वरनरसिङ केसीले आर्दशवान स्वर्गिया पाण्डेका कारण  नुवाकोटमा राजनैतिक र आर्थिक गतिविधि समेत अगाढी बढेको बताए । पाण्डेकै कारणले नागरिकहरूमा जागरण आएको र राजनीति चेत खुलेको केसीले बताए । नयाँ पुस्तालाई पाण्डेको योगदना र आर्दश पक्षका बारेमा जानकारी दिनुपर्ने उनको भनाई रहेको छ । 

समितिले सोध्यो : आयोजना अघि बढाउन समस्या के ?

रसुवा । व्यापार पूर्वाधार निर्माण कम्पनी इन्टर मोडल यातायात विकास समितिले रसुवा–टिमुरे सुख्खा बन्दरगाह निर्माणको कामलाई गति दिन निर्देशन दिएको छ । स्थलगत अनुगमन पछि निर्माण आयोजनालाई गति दिन निर्देशन दिइएको समितिका कार्यकारी निर्देशक आशिष गजुरेलले बताएका छन् ।

चीनको सहयोगमा २०७६ सालदेखि निर्माण थालिएको व्यापारिक आयोजना लक्ष्यअनुसार अघि नबढेपछि चिनियाँ पक्षलाई यस्तो निर्देशन दिइएको गजुरेलले बताए । आयोजना सकिने बेलामा जम्मा प्रगति २८ प्रतिशत मात्रै देखिएपछि यस्तो निर्देशन दिइएको उनले बताए । 

‘आयोजना अघि बढाउन समस्या के हो ? सरकारले गर्न‘ पर्ने सहजीकरण के हो ? प्रष्ट्याउन भनेका छौं’ गजुरेलले भने । यस अघि विभिन्न समस्याले अड्किएको निर्माण कार्यलाई जनशक्ति बढाएर गति दिन आग्रह गरिएको पनि समितिले जनाएको छ । हाल ५५ जना कामदारबाट दैनिक काम भइरहेको भए पनि आयोजना निर्माणमा अपेक्षअनुसार प्रतिफल नपाइएको गजुरेलले बताए । छलफलमा चिनियाँ अधिकारीहरू निर्माणलाई तिब्रता दिने विषयमा गम्भीर देखिएको पनि उनको भनाई छ ।

चीन सरकारको आर्थिक र प्राविधिक सहयोगमा निर्माणाधीन सुख्खा बन्दरगाहको काम कोरोना महामारीका कारण प्रभावित बनेको चिनियाँहरूको दाबी थियो । ३० महिनामा निर्माण सक्ने लक्ष्यसहित २०७६ मंसिर ४ गते परियोजनाको शिलान्यास गरिएको थियो । यसअघि खोलाको धार परिवर्तनका कारण दुई पटक बाढीले बन्दरगाहमा क्षति पु¥याएको थियो । 

पाँच तले बहुउपयोगी स्टोरेज बिल्डिङ, एउटा ठूलो र एउटा सानो गोदाम रहने बन्दरगाहमा १८० ठूला ट्रक र दुई वटा जाँच पास केन्द्र रहनेछ । आयोजनामा चीन सरकारले डेढ अर्ब लगानी छ । नेपाल–चीन सीमा क्षेत्रबाट १ किलोमिटर नेपालतर्फ आयोजना निर्माण भइरहेको छ ।

पैसा नहुनेको चर्चा हुँदैन : उप सभापति थापा

विदुर । नेपाली काँग्रेस नुवाकोटका उपसभापति राजु थापाले पैसा नहुनेहरूको आफ्नो पार्टीमा चर्चा नहुने भन्दै वित्रिष्णा ब्यक्त गरेका छन् । पैसा भएका नेताहरूको मात्रै चुनावमा उम्मेदवार बन्नेमा नाम आउने र चर्चा हुने भन्दै राजनीति आर्थिक हैसियतसंग तौलिने परम्परा संस्थागत भएको बताएका छन् । 

बुधबार विदुरमा आयोजित निर्वाचन आचारसंहिताको प्रभावकारिता कार्यन्वयन र सरोकारवालाहरूको भूमिकासम्बन्धी राजनीतिक दलहरूसँगको अन्तरक्रियामा उनले सो कुरा बताएका हुन् । मतदाताहरूले पनि पैसा लिएर मात्रै भोट हाल्ने गरेकोले आफु जस्ता पैसा नभएका नेताको कुनै सम्भावना नभएको उनले बताए । ‘मसंग पैसा पनि छैन, उम्मेदवार हुनेको चर्चामा मेरो नाम पनि छैन’ थापाले भने । 

नुवाकोटका राजनीतिमा धेरै नेताहरू गरिव भएकै कारण पछाडी परेको र निष्ठाले हार खाएको उनको भनाई रहेको छ । निर्वाएचन पछिल्लो समय खर्चिलो र भड्किलो बन्दै गएकोमा चिन्ता व्यक्त गर्दै एजेण्डा लिएर मतदातामा गएर मात्रै पनि जित्ने दिन कहिला आउला भनेर काँग्रेस उपसभापति थापाले प्रतिप्रश्न गरे । 

नगरपालिकाकै भेटेरिनरी प्रयोगशाला

विदुर । विदुर नगरपालिकाले पशु चिकित्सकसहित भेटेरिनरी प्रयोगशाला सञ्चालनमा ल्याएको छ ।

गएको सोमबार विदुर नगरपालिकाका प्रमुख सञ्जु पण्डितले पशु सेवा शाखा र भेटेरिनरी प्रयोगशालाको उद्घाटन गरेका छन् । सो अवसरमा उनले कृषकको टड्कारो समस्या तत्कालनै समाधान गर्नु आफ्नो जिम्मेवारी भएकोले प्रयोगशाला सञ्चालनमा ल्याएको बताएका छन् । ‘कृषि र पशु आधारित कृषकहरू धेरै भएकोले कृषकका समस्यालाई प्राथमिकतामा राखेर यो कार्यक्रम सुरुवात गर्यौ’ प्रमुख पण्डितले भने । उनका अनुसार संघीय मामिला मन्त्रालय अन्तर्गत कुनै पनि भेटेरिनरी डाक्टरको दरबन्दी प्राप्त नभएपनि विदुर नगरपालिकाको नगरसभाबाट नै डाक्टरको दरबन्दी सिर्जना गरिएको छ । 

जिल्लाको भेटेनरी पशु सेवाले समयमा सेवा दिन नसकिरहेको अवस्थामा नगरले आफ्नै स्रोत र साधनबाट नगरका पशु पन्छीपालन कृषकको व्यवसाय सुरक्षित राख्न र प्रोत्साहन गर्न भेटेनरी सेवा सञ्चालनमा ल्याएको उनले बताएका छन् ।

विदुर नगरपालिकाका उपप्रमुख गीताकुमारी दाहालले संघीय र प्रदेश सरकारले पकेट क्षेत्रको रुपमा पशुपालन व्यवसायलाई विभिन्न कार्यक्रममार्फत् बढाएतापनि पशु र पन्छीहरूमा देखिने विभिन्न रोगहरूलाई नगरमै परीक्षण गर्ने वातावरण सिर्जना गर्न सके कृषकहरूलाई सहज हुने धारणा राखेका छन् । 

कृषकको समस्या समाधान गरेर कृषि व्यवसाय बनाउन सके कृषि क्षेत्रमा रोजगारीको अवसर धेरैले पाउने उद्देश्यसाथ यसको सुरुवात गरिएको उनको भनाई रहेको छ । 

भेटेरिनरी प्रयोगशालाबाट गोबर जाँच तथा लार्भा परीक्षण, थुनेलो परीक्षण लगायतका सेवा दिइने पशु चिकित्सक सनम महर्जनले बताएका छन् । साथै पशु पन्छीको बहिरङ्ग सेवा, शल्यक्रिया तथा शव परीक्षण, पशु बन्ध्याकरण, कृत्रिम गर्वधान र विशेषज्ञ सेवा प्रदान गरिने उनले बताए । उक्त शाखाबाट निःशुल्क रुपमा औषधि समेत वितरण हुने छ । 

पशुपन्छीमा लाग्ने बर्डफ्लु लगायत अन्य रोगहरूको रोग परीक्षण पनि गरिनेछ विदुर नगरपालिकाले जनाएको छ । शाखा सञ्चालनमा आएदेखि पशुपन्छीको गम्भीर प्रकृतिको रोग परीक्षणको लागि काठमाडौं लगिनुपर्ने बाध्यता हटेको बताइएको छ । 

नुवाकोटले जित्यो १८ पदक

विदुर । बागमती प्रदेशस्तरीय खेलकुद प्रतियोगिता अन्तर्गत तेक्वान्दोमा नुवाकोटले चार स्वर्णपदकसहित १८ पदक जितेको छ । नुवाकोट दोश्रो भएको छ । 

प्रथम बागमती प्रदेश खेलकुद प्रतियोगिता अन्तर्गत मकवानपुरको हेटौंडामा तेक्वान्दो खेलका विजयीलाई गएको सोमबार पुरस्कार वितरण भयो । प्रदेश खेलकुद विकास परिषद् बागमती प्रदेशको आयोजनामा भएको प्रथम खेलकुद प्रतियोगिताको तेक्वान्दोतर्फ नुवाकोटका सुस्मिता राई, प्रिजना तामाङ, प्रविण वाइवा, धनबहादुर तामाङले स्वर्णपदक प्राप्त गरेका छन् । 

नुवाकोटले तेक्वान्दोतर्फ १० रजत र चार कास्यपदक प्राप्त गरेको छ । ८ स्वर्ण, ६ रजत, २ काश्य पदकसहित चितवन टिम प्रथम भएको हो ।